დღეს, 10 ნოემბერს, საქართველოს ფინანსთა მინისტრმა დიმიტრი გვინდაძემ და ნორვეგიის საგარეო საქმეთა მინისტრმა იონას გარ სტორემ ხელი მოაწერეს “საქართველოსა და ნორვეგიას შორის შემოსავლებზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ” შეთანხმებას. შეთანხმების მთავარი მიზანია, ხელი შეუწყოს ქვეყნებს შორის ეკონომიკური თანამშრომლობის გაღრმავებასა და ინვესტიციების მოზიდვას.
„დღევანდელი ხელშეკრულების გაფორმება პირდაპირ უკავშირდება მთავრობის 10-პუნქტიანი გეგმის განხორციელებას, რომლის ერთ-ერთი ძირითადი ელემეტი საქართველოში ინვესტიციების წახალისებაა. ამ მხრივ, არსებობს რამოდენიმე საკვანძო საერთაშორისო ხელშეკრულება, რომლებიც იდება ქვეყნებს შორის, მათ შორის, ერთ-ერთია „შემოსავლებზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ” შეთანხმება,“ - განაცხადა ფინანსთა მინისტრმა დიმიტრი გვინდაძემ. მისი თქმით, ესაა ხელშეკრულება, რომელიც ქმნის ე.წ ჩარჩო პირობებს, რომელიც ხელს უწყობს სხვადასხვა ქვეყნების მიერ საქართველოში კერძო ინვესტიციების დაბანდებას. „ბოლო 5 წლის განმავლობაში ჩვენ ნორვეგიიდან 118 მილიონი აშშ დოლარის ინვესტიცია მივიღეთ. შეთანხმების ამოქმედება ქვეყანაში ეკონომიკის ზრდის სტიმული იქნება. „შემოსავლებზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ” ხელშეკრულების გაფორმება ფინანსთა სამინისტროს პრიორიტეტია. 2012 წელს ჩვენ ხელი გვექნება მოწერილი ამ ხელშეკრულებებზე ყველა საკვანძო ქვეყანასთან, რომლებიც მოიაზრებიან საქართველოში ინვესტორებად და სავაჭრო პარტნიორებად,“ - განაცხადა ფინანსთა მინისტრმა.
ამჟამად, „ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ შეთანხმება“ ძალაშია 34 ქვეყანასთან: (დეტალები იხ. ფინანსთა სამინისტროს ვებ-გვერდზე WWW.MOF.GE)
შეთანხმება ხელმოწერილი და რატიფიცირებულია საქართველოს მხრიდან და უახლოეს მომავალში ძალაში შევა: ინდოეთის რესპუბლიკასთან, ბაჰრეინის სამეფოსთან, ეგვიპტის არაბთა რესპუბლიკასთან, ქუვეითის სახელმწიფოსთან, ისრაელის სახელმწიფოსთან და სლოვაკეთის რესპუბლიკასთან.
შეთანხმება პარაფირებულია: პორტუგალიის რესპუბლიკასთან, უნგრეთის რესპუბლიკასთან, სლოვენიის რესპუბლიკასთან, კვიპროსის რესპუბლიკასთან, ხორვატიის რესპუბლიკასთან და სერბეთის რესპუბლიკასთან.
მასალის გამოყენების პირობები