საქართველო და სომხეთი დასავლეთის ბაზარზე რეგიონის ერთობლივ რეკლამირებას გეგმავენ. როგორც სომხეთში ვიზიტისას საქართველოს ეკონომიკისა და მდგრადი განვითარების მინისტრმა ვერა ქობალიამ განაცხადა, სომხეთის პრემიერ-მინისტრ ტიგრან სარგსიანთან შეხვედრისას, საქართველომ სომხურ მხარეს დასავლეთის ბაზარზე რეგიონის ერთობლივი რეკლამირება შესთავაზა.
"საუბარია იმაზე, რომ დასავლეთის ქვეყნებს შევთავაზოთ ერთიანი ტურისტული პაკეტები, რომელშიც წარმოდგენილი იქნება საქართველოც და სომხეთიც", - აღნიშნა საქართველოს ეკონომიკისა და მდგრადი განვითარების მინისტრმა ვერა ქობალიამ. მისი თქმით, სომხეთის პრემიერ-მინისტრმა შესაბამისი დაინტერესება გამოიჩინა და ამ მიმართულებით მუშაობის დაწყების განკარგულება გასცა.
"ვფიქრობ, შემდეგი ნაბიჯი ორი ქვეყნის ტურისტულ სააგენტოებს შორის კონკრეტული დეტალების განხილვა უნდა იყოს", - განაცხადა მინისტრმა.
როგორც ცნობილია, ერევანში ვიზიტისას საქართველოს სამთავრობო დელეგაციამ სომხეთის პრემიერ-მინისტრ ტიგრან სარგსიანთან შეხვედრისას, ტურიზმის სფეროში თანამშრომლობის საკითხი განიხილა. "სომხეთიდან საქართველოში სხვადასხვა სეზონზე უამრავი მოქალაქე ჩამოდის. განსაკუთრებით ეს ხდება ზაფხულში, როდესაც ისინი შავი ზღვის სანაპიროზე ისვენებენ", - განაცხადა საქართველოს ეკონომიკისა და მდგრადი განვითარების მინისტრმა.