ხვალ, 11 ნოემბერს, 14:00 საათზე, "გუდვილი" ბათუმის ცენტრში ახალი ფორმატის ბულანჟერიას გახსნის. გახსნის ოფიციალურ ცერემონიას ქალაქ ბათუმის მერი რობერტ ჩხაიძე და "გუდვილის" ხელმძღვანელობა დაესწრება,
ბულანჟერია მემედ აბაშიძის ქუჩაზე მდებარეობს, რომელიც ერთ-ერთი ყველაზე ძველი და ლამაზი ქუჩაა ბათუმში.
"გუდვილის" მენეჯმენტის განმარტებით, ბულანჟერია "გუდვილის" ახალი ბრენდის, "მარშეს" სახელით დაიწყებს ფუნქციონირებას. შეთავაზებული იქნება ფრანგული რეცეპტურით დამზადებული პურ-ფუნთუშეული, დესერტები, კრუასანები, ტორტები.
"იქნება ყავის ფართო არჩევანი, ცნობილი ფრანგული კრუასანები. მსუბუქი, დაბალკალორიული დესერტები. არჩევანი საკმაოდ დიდია და ფასებიც ყველასთვის ხელმისაწვდომი. ნებისმიერი ჩვენი სტუმარი თავს იგრძნობს მყუდრო გარემოში, ყავის სურნელისა და ახალი პურ-ფუნთუშეულის არომატში. ასეთი ბულანჟერიები ბევრია ევროპაში და დარწმუნებული ვარ საქართველოშიც წარმატებული იქნება."- აცხადებს "გუდვილის" ვიცე პრეზიდენტი ნინო შევარდნაძე.
აღსანიშნავია, რომ "გუდვილი" ბულანჟერიის გაფართოებასაც აპირებს. ზაფხულამდე "მარშეს" ახალი ფილიალი ისევ ბათუმში გაიხსნება, მოგვიანებით კი თბილისსაც მოიცავს.
