საქართველოს ენერგეტიკისა და ბუნებრივი რესურსების მინისტრის ალექსანდრე ხეთაგურის განცხადებით, წელს, ჯამში 320 კილომეტრზე მეტი ტყის გზების გაყვანა მოხდა. ხეთაგურის თქმით, წელს, უპრეცედენტო ფაქტი მოხდა, როდესაც ტყის გზების გაყვანა დაიწყო.
ოპოზიციონერმა დეპუტატებმა მინისტრ ხეთაგურს აჭარაში ხე-ტყის ჭრასთან დაკავშირებულ საკითხებზეც დაუსვეს შეკითხვა, რაზეც მინისტრმა განმარტა, რომ აჭარაში ხე-ტყით სარგებლობის ნებართვას ენერგეტიკისა და ბუნებრივი რესურსების სამინისტრო არ გასცემს და ეს საკითხი აჭარაში, ადგილზე წყდება.
ალექსანდრე ხეთაგურმა ოპოზიციას ურჩია, რომ ამ საკითხთან დაკავშირებით შეკითხვები აჭარის ფინანსთა და ეკონომიკის სამინისტროებს დაუსვან.
კომიტეტის სხდომაზე ოპოზიციონერმა ვიცე-სპიკერმა ლევან ვეფხვაძემ განაცხადა, რომ ხულოს რაიონში შეშის გამოტანასთან დაკავშირებით პრობლემები აქვთ.
მინისტრმა ოპოზიციას უპასუხა, რომ კომიტეტის სხდომის დაწყებამდე ხულოს მაჟორიტარ დეპუტატს ხე-ტყის ჭრასთან დაკავშირებით ესაუბრა, რომელმაც განუმარტა, რომ არანაირი პრობლემა ამჟამად არ არსებობს.