2012 წელს ჯართის ექსპორტიდან 40 მილიონი ლარის მიღება იგეგმება. 2012 წლის ბიუჯეტის პროექტის თანახმად, 2012 წელს შერეული და სხვა არაკლასიფიცირებული შემოსავლების სახით მთავრობა ბიუჯეტში, 95.6 მილიონი ლარის მიღებას პროგნოზირებს, რაც სხვა შემოსავლების მთლიანი საპროგნოზო მოცულობის 31.8 პროცენტს შეადგენს და 38.6 მილიონი ლარით აღემატება მიმდინარე წლის საგეგმო მაჩვენებელს.
მთავრობის განმარტებით, რომელიც ბიუჯეტის პროექტის გადამუშავებულ ვარიანტს თან ახლავს, შერეული და სხვა არაკლასიფიცირებული შემოსავლების მაჩვენებლის გაზრდა ძირითადად მიმდინარე წელს საგადასახადო კოდექსში განხორციელებული ცვლილებებით არის განპირობებული, რომლის მიხედვითაც ჯართის ექსპორტის აქციზის გადასახადი, საფასურად გადაკეთდა.
"საფასურის ასახვა ბიუჯეტის შემოსავლებში ხდება სწორედ შერეული და სხვა არაკლასიფიცირებული შემოსავლების მუხლით. ჯართის ექსპორტის საფასურიდან მისაღები შემოსავლები 2012 წლის ბიუეჯეტის პროექტში პროგნოზირებულია 40,0 მლნ ლარის მოცულობით", - განმარტავს მთავრობა.
ბიუჯეტის პროექტის გადამუშავებული ვარიანტის პარლამენტის სხდომაზე განხილვა 10 ნოემბერს იგეგმება.
