მთავრობის მიერ შემუშავებული პროექტის თანახმად, მომავალი წლიდან პენსიები 140 ლარამდე გაიზრდება, რაშიც ჯანმრთელობის სადაზღვევო პაკეტიც შევა. ახალი სადეზღვევო პაკეტი გათვალიწინებული იქნება ყველა პენსიონერზე. ახალ მომსახურებაში შედის გადაუდებელი ოპერაციები, 20 %იანი თანადაფინანსებით.
გარდა ამისა, იქნება ლიმიტირებული ოპერაციები 1500 ლარამდე, რაც ნიშნავს, რომ ნებისმიერი დაგეგმილი ოპერაცია სადაზღვევო კომპანიის მიერ 20%-იანი თანადაფინანსებით დაიფარება.
ამავე პაკეტში შედის პენსიონრებისათვის წამლის ხარჯის დაფარვა 50%-იანი თანადაფინანსებით, რომლის ლიმიტიც 200 ლარით განისაზღვრა. ასევე მთლიანად დაიფარება სისხლისა და შარდის ანალიზები. ეს არის დაზღვევის საბაზისო პაკეტი, რომელიც სახელმწიფოს მხრიდან შემუშავდა არსებული ფინანსური რესურსების შესაბამისად. სადაზღვევო პაკეტი მომატებულ პენსიებთან ერთად 2012 წლის 1 სექტემბრიდან დაურიგდება ყველა პენსიონერს.
შესაბამისად მომავალი წლის სექტემბრიდან პენსიები 67 წლის ასაკის ზემოთ 140 ლარს მიაღწევს, ანუ პენსიის 125 ლარს დაემატება 15-ლარიანი სადაზღვევო პაკეტი.
სახელმწიფოს მხრიდან მსგავსი ახალი სადაზღვევო პაკეტი მზადდება 0-იდან 5 წლამდე ბავშვებისთვის, რომელიც თითქმის ყველა მომსახურებას ითვალისწინებს, გარდა წამლების დაფინანსებისა.