გორის ტურიზმის საინფორმაციო ცენტრმა ექვსი თვის მანძილზე 7000 უცხოელ ტურისტს უმასპინძლა. ტურისტების 45%-ი მუნიციპალიტეტის ტერიტორიაზე ერთ დღეს, ხოლო 20%-ი საშუალოდ ორ დღე-ღამეს რჩებოდა. აღნიშნული ტურიზმის საინფორმაციო ცენტრი ვიზიტორებს ინფორმაციას აწვდის გადაადგილების, განთავსებისა და კვების ობიექტების შესახებ.
,,გორის მუნიციპალიტეტი აღმოსავლეთ საქართველოს ერთ-ერთი უმნიშვნელოვანესი ტურისტული დანიშნულების ადგილია, ვინაიდან დამთვალიერებლები მას წლის ნებისმიერ დროს სტუმრობენ. ცენტრის მიზანია, მოვიზიდოთ რაც შეიძლება ბევრი ტურისტი და დავაინტერესოთ ჩვენი კუთხით. აღსანიშნავია ისიც, რომ აქტიურად მიმდინარეობს რუკის შექმნაზე მიუშაობა, რომელიც ტურისტებს ინფორმაციას მიაწვდის ქვეყნის მასშტაბით მათთვის საჭირო ობიექტების ადგილმდებარეობის შესახებ." - აცხადებენ გორის ტურიზმის საინფორმაციო ცენტრში.
გორის ტურიზმის საინფორმაციო ცენტრი, რომელიც გერმანიის საერთაშორისო თანამშრომლობის საზოგადოებისა (GIZ) და ადგილობრივი ბიუჯეტის დაფინასებით აშენდა, მიმდინარე წლის 26 აპრილს გაიხსნა.
