საქართველოში სსფ-ის მუდმივი წარმომადგენლის, ედვარდ გარდნერის განმარტებით, საქართველოს საკმაოდ დიდი საგარეო ვალი გააჩნია. მისი თქმით, დღისათვის ქვეყნის საგარეო ვალი მშპ-თან მიმართებაში 40 %-ს აღწევს. თუმც გარდნერის აზრით, საქართველოს სხვა ქვეყნებთან შედარებით საკმაოდ მომგებიან პოზიციაზე იმყოფება, რადგანაც ქვეყანას ვალი აღებული აქვს სხვადასხვა საერთაშორისო ინსტიტუტებიდან და ის დამოკიდებული არ არის რომელიმე ქვეყნის ბაზარზე. გარდნერი მიიჩნევს, რომ საქართველოსთვის ვალის არსებული მოცულობა კრიზისს არ ნიშნავს, თუმც მისი აზრით, ამ მიმართულებით ყურადღების გამახვილება მიზანშეწონილია.
საგარეო ვალთან მიმართებაში განსხვავებულია ექსპერტ ირაკლი კოვზანაძის შეფასება. ექსპერტი ეკონომიკის საკითხებში ირაკლი კოვზანაძე ამბობს, რომ საგარეო ვალთან მიმართებაში ქვეყანას საფრთხე არ ემუქრება.
"საგარეო ვალი ჩვენი ტიპის ქვეყნებისათვის მიჩნეულია რომ მშპ-ს 60 %-ზე მაღალი არ უნდა იყოს. თუმცა საქართველოს შემთხვევაში გაცილებით უკეთესი ვითარებაა. რადგანაც ვალი 42 %-ის ფარგლებშია და ამ ეტაპიათვის რაიმე საგანგაშო ვითარება არ არის. თუმცა ქვეყნის ამოცანაა, რომ ვალი შეამციროს, რაც მშპ-ს ზრდით უნდა მიიღწეს"- განაცხადა კოვზანაძემ.