"ახალი მემარჯვენეების" ეკონომიკური მიმართულების ხელმძღვანელი ლევან კალანდაძე, მთავრობის 10-პუნქტიან გეგმის ეკონომიკურ ნაწილს ზედაპირულ დოკუმენტად აფასებს. კალანდაძე მიიჩნევს, რომ დოკუმენტი არანაირ ეკონომიკურ ან ფინანსურ გათვლებსა და პროგნოზებს არ ეფუძნება. მისი თქმით, დოკუმენტში წარმოდგენილი არ არის დასახელებული მიზნების და ფინანსური ინდიკატორების მიღწევის კონკრეტული გზები და საშუალებები.
"ხელისუფლების მიერ ერთ-ერთ მთავარ პრიორიტეტად სამეწარმეო და საგადასახადო გარემოს გაუმჯობესება, ექსპორტზე ორიენტირებული წარმოების ზრდაა დასახელებული, თუმცა ამ თვალსაზრისით კონკრეტულ ნაბიჯებს დოკუმენტი არ ითვალისწინებს. პირიქით, ბოლოდროინდელი ცვლილებები საგადასახადო კოდექსში სწორედაც რომ საპირისპიროს მოწმობს. რეალურად, კიდევ უფრო მკაცრდება საგადასახადო ადმინისტრირების წნეხი ბიზნესზე, განსაკუთრებით მცირე და საშუალო ბიზნესზე და ქვეყანაში ყალიბდება ე.წ. საგადასახადო "ოდეერების" რეჟიმი, რაც საგადასახადო ტერორის და საგადასახადო დევნის კიდევ უფრო გამკაცრებას და გამძაფრებას გულისხმობს", - აცხადებს კალანდაძე.
კალანდაძე განმარტავს, რომ დოკუმენტში პრაქტიკულად არაფერია ნათქვამი უსაფრთხო და პროგნოზირებადი ბიზნესგარემოს ჩამოყალიბებაზე.
"როგორც ჩანს, ხელისუფლება არ აპირებს ეკონომიკური გადაცდომებისთვის წინასწარი პატიმრობის გაუქმებას, ბიზნესთან წინასწარ დადგენილი თამაშის წესებით ურთიერთობას, უზარმაზარი ჯარიმების და საურავების გაუქმებას, რის გარეშეც წარმოუდგენელია რაიმე წარმატების მიღწევა ქვეყანაში მაკროეკონომიკური პარამეტრების გაუმჯობესების თვალსაზრისით. "ახალი მემარჯვენეების" ეკონომიკური პროგრამა სწორედ უსაფრთხო და პროგნოზირებადი გარემოს ჩამოყალიბებას მიიჩნევს ბიზნესის განვითარების მთავარ ბერკეტად", - განმარტავს "ახალი მემარჯვენეების" ეკონომიკური მიმართულების ხელმძღვანელი ლევან კალანდაძე.
მისი განმარტებით, დოკუმენტის მიხედვით, ხელისუფლების პრიორიტეტად კვლავ მსხვილი ბიზნესი რჩება.
"10 პუნქტიან გეგმაში" მცირე და საშუალო მეწარმეობის პრიორიტეტულობა და საჭიროებები, უსაფრთხო და პროგნოზირებადი ბიზნესგარემოს ჩამოყალიბების საკითხი კვლავაც იგნორირებულია. როგორც ჩანს მთავრობა არ აპირებს კომუნიკაციას მცირე მეწარმეებთან და მათი საჭიროებების, მათი ინტერესების საკანონმდებლო აქტებში რეალურ ასახვას. "ახალი მემარჯვენეები" კი მივიჩნევთ, რომ სწორედ მცირე და საშუალო ბიზნესის ხელშეწყობა უნდა იყოს ქვეყნის პრიორიტეტი და ჩვენს ეკონომიკურ პროგრამაში ჩამოყალიბებული გავქვს ამ მიმართულებით განსახორციელებელი ეფექტური ღონისძიებები", - აცხადებს კალანდაძე.
"ახალი მემარჯვენეები" მიიჩნევენ, რომ დოკუმენტში არ ჩანს, კონკრეტულად როგორ გაუმჯობესდება მიმდინარე ბალანსი, როგორ მოხდება ექსპორტის ხელშეწყობა, დასაქმების პრობლემის გადაწყვეტა, რაც "ახალი მემარჯვენეების" ეკონომიკური პოლიტიკის დოკუმენტში უფრო მკაფიოდაა ჩამოყალიბებული.
პარტიაში განმარტავენ, რომ მთავრობა მხოლოდ 45-იდან 60 წლამდე მოსახლეობის დაბეგვრის საშეღავათო რეჟიმის შემოღების ინიციატივაზე ახდენს აპელირებას, რაც პრაქტიკულად სოციალურ პროექტს წარმოადგენს.
"ეს ინიციატივა არანაირ ფისკალურ შედეგს არ მოუტანს ბიზნესს და რაც მთავარია, არავითარ მასტიმულირებელ ფაქტორს არ წარმოადგენს დამატებითი სამუშაო ადგილების შესაქმნელად. ამ მხრივ, სასურველი და უფრო ეფექტური იქნებოდა, მთავრობა დასაქმებულებისთვის საშემოსავლო გადასახადის განაკვეთების შემცირების ან მაგალითად, მცირე და საშუალო ბიზნესისთვის საშეღავათო დაბეგვრის რეჟიმის დაწესების ინიციატივით გამოსულიყო და არა დისკრიმინაციული და შედეგზე არაორიენტირებული რეჟიმის დაწესების ინიციატივით, რომელსაც მხოლოდ წინასაარჩევნო პიარული ეფექტი და დატვირთვა აქვს. "ახალი მემარჯვენეები" მივიჩნევთ, რომ ეკონომიკის გაჯანსაღება ქვეყანაში შეუძლებელი იქნება მონოპოლიების არსებობის პირობებში, რომელიც დღეს ხელისუფლების ღია მხარდაჭერით და ხელშეწყობით ქვეყნის განვითარების უმთავრეს შემაფერხებელ ფაქტორს წარმოადგენს და მასზე დოკუმენტში არაფერია ნათქვამი", - აცხადებს კალანდაძე.
"ახალი მემარჯვენეები" მოუწოდებენ ხელისუფლებას, თავი დაანებონ მათთვის დამახასიათებელ პრაქტიკას, როცა მსგავსი ტიპის დოკუმენტები მხოლოდ პიარული მიზნებისთვის იქმნება და ექსპერტებთან, პოლიტიკოსებთან, სპეციალისტებთან კონსულტაციების შედეგად შექმნას ქვეყნის განვითარების მართლაც რეალური და ეფექტური გეგმა.
"ახალი მემარჯვენეები" საქართველოს მთავრობის მიერ ინიცირებული "სტრატეგიული განვითარების 10-პუნქტიანი გეგმის" შეფასებას ცალკეული მიმართულებების მიხედვით აპირებენ და ამას რამდენიმე პრესკონფერენციას მიუძღვნიან.