სოფლის მეურნეობის მინისტრი ზაზა გოროზია ღვინის მწარმოებელი კომპანიების ხელმძღვანელებს შეხვდა, და მათ სოფლის მეურნეობის განვითარების ათ პუნქტიანი სამოქმედი გეგმა გააცნო. მინისტრმა მეწარმეებთან ერთად ამ გეგმის ერთერთი ყველაზე მთავარი პუნქტი, მეღვინეობის ხელშეწყობა და განვითარება დეტალურად განიხილა. ამ სფეროში არსებულ პრობლემებზე, მათი გადაჭრის გზებზე, ასევე მსოფლიო ბაზარზე ქართული ღვინის პოპულარიზაციასა და ექსპორტის გაზრდასთან დაკავშირებით, მეღვინეებმა სოფლის მეურნეობის მინისტრს თავისი შეხედულებები გააცნეს.
,,საქართველოს სოფლის მეურნეობაში მეღვინეობას უმთავრესი როლი უჭირავს. ყველაზე მეტი პროდუქტი, რაც ექსპორტზე გადის, სწორედ რომ ღვინო და ღვინის პროდუქტებია. აუცილებელია, რომ მეღვინეებთან და ამ სექტორში მომუშავე ადამიანებთან განვიხილოთ დარგში არსებული ყველა პრობლემა, რათა უკეთ შევძლოთ მათი დახმარება", - განაცხადა ზაზა გოროზიამ.
სოფლის მეურნეობის მინისტრის ინიციატივით, ღვინის ეროვნული სააგენტოს ხელმძღვანელის შერჩევის შემდეგ, შეიქმნება სპეციალური საკონსულტაციო ჯგუფი, რომელიც ქართული ღვინის პოპულარიზაციის და ექსპორტის ზრდის ერთ წლიან სამოქმედო გეგმას შეიმუშავებს. ამ ჯგუფში სოფლის მეურნეობის მინისტრი, ღვინის ეროვნული სააგენტოს ხელმძღვანელი, მეღვინეები და ყველა იმ უწყების წარმომადგენელი გაერთიანდება, რომლებსაც ამ მიმართულებით მუშაობის გამოცდილება აქვს.
