თბილისის საქალაქო სასამართლომ დაასრულა სისხლის სამართლის საქმის განხილვა, წინასწარი შეთანხმებით ჯგუფის მიერ, კულტურული მემკვიდრეობის ძეგლის-ნიკო ფიროსმანის აბრაზე შესრულებული ნახატის, საქართველოს ეკონომიკურ საზღვარზე წესის დარღვევით გადატანის მომზადების ფაქტზე, ბრალდებულების გელა სანიკიძის, გაიოზ ჯავახიშვილის, დავით ზირაქაშვილის,ზურაბ დათუკიშვილის და ალექსანდრე ფურცხვანიძის მიმართ, დანაშაული გათვალისწინებულია სისხლის სამართლის კოდექსის 18, 214-ე მუხლის მე-5 ნაწილის "დ" ქვეპუნქტით.
თბილისის საქალაქო სასამართლომ საპროცესო შეთანხმების საფუძველზე ალექსანდრე ფურცხვანიძეს, გაიოზ ჯავახიშვილს, დავით ზირაქაშვილს სასჯელის სახედ და ზომად თითოეულს 5(ხუთი) წლის ვადით თავისუფლების აღკვეთა განუსაზღვრა, რაც ჩაეთვალათ პირობითად, 6 წლის გამოსაცდელი ვადით; მათ შორის, გაიოზ ჯავახიშვილს სახელმწიფოს სასარგებლოდ უსასყიდლოდ ჩამოერთვა ნიკო ფიროსმანის აბრაზე შესრულებული ნახატი - "კახური ღვინო"; გელა სანიკიძეს სასამართლომ 6 (ექვსი) წლისა და 6 (ექვსი) თვის ვადით თავისუფლების აღკვეთა განუსაზღვრა, საიდანაც მსჯავრდებული 1 წელსა და 6 თვეს მოიხდის სასჯელაღსრულების დაწესებულებაში, ხოლო 5 წელი ჩაეთვალა პირობითად, 6 წლის გამოსაცდელი ვადით, ხოლო ზურაბ დათუკიშვილს სასჯელის სახედ 6 (ექვსი) წლის ვადით თავისუფლების აღკვეთა განესაზღვრა, საიდანაც მსჯავრდებული 1 წელს მოიხდის სასჯელაღსრულების დაწესებულებაში, ხოლო 5 წელი ჩაეთვალა პირობითად, 6 წლის გამოსაცდელი ვადით.
"საქმის მასალების მიხედვით: საქართველოს ეროვნული მუზეუმის კურატორი გაიოზ ჯავახიშვილი 2010 წლის ზაფხულიდან გეგმავდა, მის ფლობელობაში არსებული კულტურული მემკვიდრეობის ძეგლის - ნიკო ფიროსმანაშვილის აბრაზე შესრულებული ნახატის - "კახური ღვინო"-ს 500 000 აშშ დოლარად გაყიდვას და ამ გზით გამდიდრებას. მიუხედავად იმისა, რომ სურათის საზღვარგარეთ ლეგალურად გატანის უფლება არ ჰქონდა, იგი დაუკავშირდა შპს "იურიდიული მომსახურების საერთაშორისო ცენტრი"-ს ხელმძღვანელს გელა სანიკიძეს და ალექსანდრე ფურცხვანიძეს, ხოლო მათი მეშვეობით, დამატებითი თანხის სანაცვლოდ, სურათის შეძენა და არალეგალურად აზერბაიჯანის ტერიტორიაზე გადატანა შეთავაზეს მამუკა შეროზიას. შეთანხმებისამებრ, ფიროსმანის ნახატის აზერბაიჯანის ტერიტორიაზე გადატანა, უნდა უზრუნველეყოთ ადვოკატ დავით ზირაქაშვილსა და ზურაბ დათუკიშვილს, აღნიშნული პირები ასევე შეთანხმდენ ანგარიშსწორების პირობებზე. მიუხედავად იმისა რომ, ფიროსმანის ნახატის აზერბაიჯანში გადატანის პირობები რეალურად შექმნილი იყო, 2011 წლის 31 მარტს, სამართალდამცავი ორგანოების მიერ მოხდა დანაშაულებრივი ჯგუფის წევრთა დაკავება, ასევე, აღკვეთილი იქნა სურათის არალეგალურად გადატანა. ღია სასამართლო სხდომაზე საქმის არსებითი განხილვისას ბრალდებულებმა აღიარეს ჩადენილი დანაშაული, ასევე აქტიურად ითანამშრომლეს გამოძიებასთან, რის საფუძველზეც მხარეთა შორის გაფორმდა საპროცესო შეთანხმება. გარდა ბრალდებულთა აღიარებისა, მათი ბრალეულობა დადასტურებული იქნა სს საქმეში არსებულ უტყუარ მტკიცებულებათა ერთობლიობით", - აღნიშნულია საქალაქო სასამართლოს განცხადებაში.