საქართველოსა და სეპარატისტულ აფხაზეთს შორის მორიგი, ამჯერად გასტრონომიულ სკანდალი მწიფდება. ინტერნეტგამოცემა "ეხო კავკაზას" ვებგვერდზე სომეხი ეროვნების ჟურნალისტი ლევონ გალუსტიანი ამ თემას სტატიას უძღვნის, სახელწოდებით "ჩურჩხელა თუ აჯინჯუხი?"
"საქართველოს ხელისუფლება ნაციონალური პროდუქტების 37 დასახელების საქონლის დაპატენტებას აპირებს. ქართული სამზარეულოს ბრენდები გახდება: ჭაჭა, ხაჭაპური, ჩურჩხელა. უახლოეს მომავალში ამ დასახელების გამოყენება სხვა ქვეყნებში უფლების მოპოვების გარეშე უკანონო იქნება. აფხაზეთში საქართველოს ამ გადაწყვეტილებამ სერიოზული შეშფოთება გამოიწვია", _ წერს ჟურნალისტი სტატიის დასაწყისში და აღნიშნავს, რომ საუბარი მიდის ხაჭაპურზე, სულგუნზე, ჩურჩხელაზე და სხვა "ტრადიციულ კავკასიურ საჭმელებზე, სწორედ კავკასიურზე და არა ქართულზე". ჟურნალისტი აღნიშნავს, რომ ეს პროდუქტები აფხაზეთშიც დიდი პოპულარობით სარგებლობს.
"არ შეიძლება ამ ნიშნების დარეგისტრირება, იმაზე დაყრდნობით, რომ ეს არის ელემენტები არა მხოლოდ ქართული, არამედ აფხაზური სამზარეულოსიც", _ აცხადებს აფხაზეთის ე.წ. საპატენტო რწმუნებული ნატალია კვარაცხელია და აფხაზეთის ე.წ. ხელისუფლებას აჩქარებისკენ მოუწოდებს.
ჟურნალისტი წერს, რომ ქართულმა მხარემ განცხადება უკვე გააკეთა, მას შესაბამისი განაცხადი უკვე მზად აქვს და მალე მსოფლიოს ყველა ქვეყანაში გააგზავნის. რუსეთში "ნაციონალური პროდუქტის" ბრენდის სახელწოდენი მინიჭება "როსპატენტის" პრეროგატივაა. აფხაზეთის სოფლის მეურნეობის სამინისტრომ და "გოსსტანდარტმა" მათ უნდა დაასწრონ, წინააღმდეგ შემთხვევაში, აფხაზი მეწარმეებისთვის "ჭაჭა" ან "სულგუნის" გამოყენება უკანონო გახდება და აფხაზ მეწარმეებს ფულის მესაკუთრისთვის, ამ შემთხვევაში საქართველოსთვის, გადახდა მოუწევთ.
"ჩვენ უნდა მოვასწროთ. მიმაჩნია, რომ აფხაზეთსა და რუსეთს შორის ამჟამად შექმნილი სიტუაციის გამოყენებით, შესაძლოა მოვიგოთ ეს დავა", _ აცხადებს კვარაცხელია და გამოსახალს სახელწობების შეცვლაში ხედავს. მაგალითად, მისი აზრით, შეიძლება "ჩურჩეხელას" აფხაზური სახელწოდება "აჯინჯუხი" დაარქვა, "ხაჭაპურს" კი "აჩაში".
"მაგრამ პრობლემა ისაა, რომ "ჩურჩხელა" ყველამ იცის, "აჯინჯუხი" რომ მისი ძმაა - ეს რუსეთში არავინ იცის, უცხოელებისთვის კი ამის ახსნას დიდი დრო დასჭირდება", _ აცხადებს კვარაცხელია.
ჟურნალისტი სტატიის ბოლოს აღნიშნავს, რომ "აფხაზური ღვინოები და მინერალური წყალი "კოდორი" - ერთადერთი საქონელია, რომლებმაც ოფიციალური რეგისტრაცია რუსეთში მიიღო. მალე ასეთივე განაცხადი, პატენტის მიღებისთვის აფხაზურ აჯიკაზედაც შევა, მაგრამ ეს ზღვაში წვეთია. აფხაზეთი მდიდარია თავისი ბრენდებით და ეს იურიდიულად უნდა გაფორმდეს. ამ შემთხვევაში კი ეს არა მხოლოდ ბიზნესის, არამედ მთავრობის საზრუნავიც უნდა გახდეს", _ ნათქვამია სტატიის ბოლოს.
