პოლონეთის პრემიერ-მინისტრმა დონალდ ტუსკმა პარლამენტს განუცხადა, რომ ღამით პოლონეთის საჰაერო სივრცე 19-მა დრონმა დაარღვია, რომელთა უმეტესობა ბელარუსიდან იყო.
მისი თქმით, სამი დრონის განადგურება დადასტურებულია და, სავარაუდოდ, მეოთხე დრონიც ჩამოაგდეს. მანამდე ტუსკმა საგანგებო მთავრობის სხდომაზე რუსული დრონების „დიდი რაოდენობის“ შესახებ ისაუბრა.
მოსკოვს მომხდარს ჯერ არ გამოხმაურებია.
„ის ფაქტი, რომ ეს დრონები, რომლებიც უსაფრთხოებისთვის საფრთხეს წარმოადგენდნენ, ჩამოაგდეს, პოლიტიკურ სიტუაციას ცვლის“, - განაცხადა ტუსკმა.
მისი თქმით, პოლონეთმა მოითხოვა ნატო-ს ხელშეკრულების მე-4 მუხლის ამოქმედება, რომელიც წევრ ქვეყნებს საშუალებას აძლევს, საკითხი ალიანსის გადაწყვეტილების მიმღებ მთავარ ორგანოში, ჩრდილოატლანტიკურ საბჭოში დააყენონ, რის შემდეგაც გაიმართება კონსულტაციები იმის დასადგენად, დაემუქრა თუ არა წევრი ქვეყნის ტერიტორიულ მთლიანობას, პოლიტიკურ დამოუკიდებლობას ან უსაფრთხოებას საფრთხე.
მე-4 მუხლი ითვალისწინებს, რომ ალიანსის წევრებმა ერთმანეთთან კონსულტაციები გამართონ, თუ რომელიმე მათგანის აზრით, ნატო-ს ქვეყნების ტერიტორიული მთლიანობა, პოლიტიკური დამოუკიდებლობა ან უსაფრთხოება საფრთხის ქვეშაა.
