საქართველოს საგარეო საქმეთა მინისტრის მოადგილის ნინო კალანდაძის განცხადებით, ქართული პროდუქციის დაპატენტება სხვადასხვა ქვეყნის ბაზარზე აღმოჩენილმა დარღვევებმა განაპირობა.
"ეს კანონდარღვევა ხდებოდა ძირითადად რუსეთისგან. ჩვენ გავუგზავნეთ ყველას დაპატენტების შესახებ ინფორმაცია, მათ შორის რუსეთსაც", - განაცხადა კალანდაძემ დღეს გამართულ ტრადიციულ ბრიფინგზე.
კალანდაძის თქმით, პროდუქციის დაპატენტება მოხდა კანონის სრული დაცვით.
შეგახსენებთ, რომ საქართველოს ინტელექტუალური საკუთრების ეროვნული ცენტრი „საქპატენტი" 19 დასახელების პროდუქციის დაპატენტების პროცესს იწყებს.
დაპატენტების პროცესი „საქპატენტმა" სოფლის მეურნეობის სამინისტროს განცხადების საფუძველზე დაიწყო.
რეგისტრაციის პროცესი დაიწყო შემდეგ ქართულ პროდუქციებზე: ბორჯომი", „საირმე", „ნაბეღლავი", „სულგუნი" („შებოლილი სულგუნი"), „მეგრული სულგუნი," „სვანური სულგუნი," „იმერული ყველი," „ქართული ყველი," „თუშური გუდა," „გუდა," „მესხური ჩეჩილი," „აჭარული ჩლეჩილი," „დამბალ ხაჭო", „ტენილი", „ჩოგი", „კობი","მაწონი", „ჭაჭა", „ჩურჩხელა".
„საქპატენტის" 1999 წლის 22 ივნისის „საქონლის ადგილწარმოშობის დასახელებისა და გეოგრაფიული აღნიშვნის შესახებ" კანონის თანახმად, „საქპატენტის" მიერ მასალების გამოქვეყნებიდან 3 თვის ვადაში, თუ აღნიშნულ მასალებთან დაკავშირებით დამატებითი ინფორმაცია არ შევა, აღნიშნული პროდუქციის რეგისტრაციის შესახებ ცნობა სხვა ქვეყნებში გავრცელდება.
ამ დროისთვის ევროკავშირთან ხელმოწერილი ხელშეკრულებით, ევროპის ქვეყნებში 18 ქართული ადგილწარმოშობის ღვინოა დარეგისტრირებული. ესენია "ატენი", "ახაშენი", "წინანდალი", "გურჯაანი", "კარდენახი", "კახეთი", "კოტეხი", "ყვარელი", "მანავი", "მუკუზანი", "ნაფარეული", "ქინძმარაული", "სვირი", "თელიანი", "ტიბაანი", "ტვიში", "ვაზისუბანი" და "ხვანჭკარა". აღნიშნული პროდუქციის რეგისტრაციის პროცესი აშშ-ში მიმდინარეობს.
