საცხოვრებელი სახლების მშენებლობის შემდეგ "ორბი ჯგუფი" ტურიზმის სექტორშიც შედის და ბათუმში მინიმუმ 100-ნომრიანი სასტუმროს მშენებლობას გეგმავს. როგორც სააგენტო "ჯი-ეიჩ-ენთან" საუბრისას, "ორბი ჯგუფის" გენერალურმა დირექტორმა ირაკლი კვერღელიძემ განაცხადა, ამ დროისათვის უცნობია თუ რა ბრენდის სასტუმრო აშენდება, რადგანაც კომპანია ჯერ კიდევ აწარმოებს მოლაპარაკებას 3-4 ვარსკვლავის მქონე სასტუმროთა ქსელის მქონე კომპანიებთან.
კვერღელიძე ამ დროისათვის კონკრეტულ კომპანიებს არ ასახელებს, თუმცა განმარტავს, რომ მოლაპარაკებები სამ კომპანიასთან მიმდინარეობს.
"ორბი ჯგუფი" უცხოურ კომპანიებთან მოლაპარაკების დასრულებას წლის ბოლომდე ელოდება და სწორედ ამის შემდეგ შეთანხმდება პარტნიორთან სასტუმროს პროექტი და ნომრების ზუსტი რაოდენობა. შესაბამისად, "ორბი ჯგუფში" განსახორციელებელი ინვესტიციის ზუსტ მოცულობასაც ვერ აკონკრეტებენ.
"ორბი ჯგუფმა" ბათუმში, ხიმშიაშვილისა და კობალაძის ქუჩების კვეთაში მიწის ნაკვეთი ბათუმის მერიისგან უკვე შეიძინა, რაშიც 2 მლნ. 720 ათასი ლარი გადაიხადა. სახელმწიფოსა და "ორბი ჯგუფს" შორის გაფორმებული ხელშეკრულების მიხედვით, ინვესტორი ვალდებულია სასტუმროს მშენებლობა 36 თვეში ანუ 2014 წლის ბოლომდე დაასრულოს.
აღსანიშნავია, რომ აღნიშნული მიწის ნაკვეთს, ადრე აღნაგობის წესით თურქულ კომპანია ფლობდა, რომელიც ფრანგული ბრენდის დახმარებით აჭარაში 120 ნომრიანი სასტუმროს მშენებლობას გეგმავდა. თუმცა საბოლოოდ შეთანხმება ჩაიშალა და ბათუმის მერიამ თურქულ კომპანიასთან ხელშეკრულება გაწყვიტა.