„საქართველოს კონტროლის პალატის შესახებ" კანონში შესატან ცვლილებათა პაკეტს, რომლის ინიცირებაც საშემოდგომო სესიის პირველ ბიუროს სხდომაზე მოხდა, უკან გაიწვევენ.
ამის შესახებ ჟურნალისტებს კონტროლის პალატის თავმჯდომარე ლევან ბეჟაშვილმა განუცხადა და აქვე განმარტა, რომ კანონპროექტის გაწვევის რეკომენდაცია ავტორებს თავად მისმა უწყებამ მისცა.
„ცვლილებები გაუგებარი იყო. კანონპროექტი ითვალისწინებს მხოლოდ საგადასახადო ვალდებულებების შემოწმების საკითხს, კონტროლის პალატა კი მარტო საგადასახადო ვალდებულებებს კი არ ამოწმებს, არამედ იმასაც, თუ რამდენად კანონიერად, რამდენად ეფექტურად მოხდა საბიუჯეტო სახსრების ხარჯვა და რამდენად მიზნობრივად მოხდა, ვთქვათ, სახელმწიფო კომპანიების მიერ მიღებული სარგებლის გამოყენება. ამიტომ ჩვენი რეკომენდაცია იყო, რომ კანონპროექტი უკან გამოეწვიათ", - განმარტა ბეჟაშვილმა.