ყოფილ სახელმწიფო მინისტრ გოგა ხაინდრავას განცხადებით, დღეს რომ იყოს 1924 წელი, რურუები რობერტ სტურუას მოკლავდნენ. როგორც ხაინდრავამ "ჯი-ეიჩ-ენთან" საუბრისას განაცხადა, ნიკა რურუა არის მკვლელი და საქართველოში კვდება კულტურა.
"როცა კულტურის სათავეში აყენებენ მკვლელს, ის კულტურა კვდება. რურუა არის მკვლელი. მკვლელი არის მერაბიშვილი და კვდება ის სფერო, რომელსაც ის განაგებს. მკვლელი არის სააკაშვილი და კვდება ეს სახელმწიფო. მკვლელი არის ადეიშვილი და კვდება სამართალი ამ ქვეყანაში. მკვლელი არის რურუა და კვდება კულტურა საქართველოში. როდესაც ჯუჯები იწყებენ გოლიათებთან ჭიდაობას, ვღებულობთ იმას, რასაც ვღებულობთ, იმიტომ რომ ისტორიასთან ბრძოლა - ეს არის ჯუჯების ხვედრი. წარსულთან ბრძოლა, აწმყოსთან ბრძოლა, შემდგარ ფაქტებთან ბრძოლა ჯუჯების ხვედრია. რობერტ სტურუა შედგა როგორც ფენომენი მთელ მსოფლიოში. ეს უკვე წარსულია და ამასთან რამდენიც არ უნდა იბრძოლო, ვერაფერს მოიგებ, იმიტომ, რომ ის შემდგარი ფაქტია უკვე. ეს არის უნიჭოების, შეუმდგარი და გაუბედავი ადმიანების ბრძოლა გაბედულ ადამიანებთან და როგორ მიდის ეს ბრძოლა - მიდის სროლები. ეს რომ ყოფილიყო 24 წელში, რურუები მოკლავდნენ სტურუას ან ქუჩაში ან რომელიმე ჯურღმულში. დღეს ეს არ შეუძლიათ და იშორებენ იმ გზით, რა გზითაც შეუძლიათ", - განაცხადა ხაინდრავამ "ჯი-ეიჩ-ენთან" საუბრისასი.
მისი თქმით, უბედურება ისაა, რომ საზოგადოება ეგუება იმას, რომ მკვლელებმა მართონ ეს ქვეყანა.
"საზოგადოება ეგუება იმას, რომ მკვლელებმა ჩაიბარონ კულტურა და მერე ამ მკვლელებთან მიდიან და კულტურაზე ელაპარაკებიან, საერთო გეგმებს სახავენ. სტურუას მთელი მოღვაწეობა არის ჩემი შეგნებული ცხოვრება. დარბაზები ინგრეოდა, იქ იყვნენ ისეთი ადამიანები, რომლებიც რობიკოს დანახვისთვის ნახევარ სიცოცხლეს გაიღებდნენ და აქ რა რაოდენობის ხალხიც არის, პარტერსაც კი ვერ შეავსებს. ეს არის შემგუებლობა, რაც ყველაზე დიდი სენია და კლავს ამ საზოგადოებას", - განაცხადა ხაინდრავამ კულტურის სამინისტროსთან სტურუას მხარდამჭერ აქციაზე.
მისი თქმით, რობერტ სტურუას ქსენოფობიაში დადანაშაულება სრული აბსურდია.
"რაც შეეხება ქსენოფობიას... რაში არის ქსენოფობია. ის რომ სამ თუ ოთხ ადამიანზე თქვა, რომ სომეხია, ეს ქსენოფობია? სააკაშვილები რომ სომხები არიან, ეს ყველამ იცის და თითონ მიხეილ სააკაშვილმაც მშვენივრად იცის. ქსენოფობია არის ის, როდესაც სააკაშვილი ლაპარაკობს, როდესაც ზანგებს იხსენიებს არასრულფასოვნებად. აი ეს არის ქსენოფობია. ქსენოფობია არის ის, რასაც სააკაშვილი სჩადის საკუთარი ხალხის მიმართ", - აღნიშნა ხაინდრავამ.
შეგახსენებთ, რომ რუსთვალის თეატრის სამხატვრო ხელმძღვანელი რობერტ სტურუა, კულტურისა და ძეგლთა დაცვის მინისტრის ნიკოლოზ რურუას მიერ 9 აგვისტოს ხელმოწერილი ბრძანების თანახმად, თანამდებობიდან გაათავისუფლეს. მინისტრის განცხადებით, ქართველი რეჟისორის განთავისუფლება მის მიერ სომხების მისამართით გაკეთებულ ქსენოფობიურ განცხადებებს უკავშირდება. თავად სტურუას თქმით, მისი ნათქვამის ინტერპრეტაცია არასწორად მოხდა. "მე რასისტი არ ვარ!", - აცხადებს სტურუა.
