რუსეთის ვმო-ში გაწევრიანების საკითხთან დაკავშირებით ქართულ და შვეიცარულ მხარეს შორის შეხვედრა გაიმართა.
როგორც "ჯი-ეიჩ-ენს" საგარეო უწყებაში განუცხადეს, მხარეებმა შვეიცარიის შუამავლობით საქართველოსა და რუსეთს შორის მიმდინარე მოლაპარაკებების მდგომარეობა და მხარეების პოზიციების დაახლოების შესაძლებლობები განიხილეს.
შეხვედრაზე აღინიშნა რუსეთის ფედერაციაში შვეიცარიის კონფედერაციის საელჩოს საქართველოს ინტერესების სექციის ნორმალური და შეუფერხებელი ფუნქციონირების აღდგენის აუცილებლობა.
საქართველოს მხრიდან შეხვედრაში მონაწილეობდნენ საქართველოს საგარეო საქმეთა მინისტრი გრიგოლ ვაშაძე, მინისტრის მოადგილე სერგი კაპანაძე, საქართველოს პრემიერ-მინისტრის მრჩეველთა ჯგუფის ხელმძღვანელი თამარ კოვზირიძე, საგარეო საქმეთა სამინისტროს დსთ-ს დეპარტამენტის დირექტორი გიორგი ყარალაშვილი, უწყების სამდივნოს უფროსი თამარ კაპანაძე და საერთაშორისო ორგანიზაციების დეპარტამენტის დირექტორის მოადგილე თეონა გიუაშვილი; შვეიცარიის მხრიდან კი - საგარეო საქმეთა ფედერალური დეპარტამენტის სახელმწიფო მდივანი პიტერ მაურერი, საგარეო საქმეთა ფედერალური დეპარტამენტის ხელმძღვანელის კაბინეტის უფროსი ჰაიდი გრაუ, შვეიცარიის ელჩი ვმო-ში და შვეიცარიის ელჩი საქართველოში გიუნტერ ბეხლერი.
