"IDS ბორჯომი საქართველოს" რუსეთისთვის მინერალური წყლის ბაზარზე დაბრუნების თხოვნით არ მიუმართავს. როგორც სააგენტო "ჯი-ეიჩ-ენთან" საუბრისას "IDS ბორჯომი საქართველოს" წარმომადგენელმა ნიცა ჩოლოყაშვილმა განაცხადა, კომპანიას ასეთი წინადადებით რუსეთის მთავარი სანიტარული სამსახურისთვის არ მიუმართავს.
როგორც ცნობილია, "როსპოტრებნადზორი" რუსეთში ქართული მინერალური წყლის, "ბორჯომის", მიწოდების აღდგენის საკითხს განიხილავს. უწყებაში შესულია განაცხადი რუსეთის ფედერაციაში "ბორჯომის" შეტანის შესახებ, თუმცა ქართულ მხარეს განცხადების შეტანის შესახებ ინფორმაცია არ გაუვრცელებია.
"მომხმარებელთა უფლებების დაცვისა და ადამიანის კეთილდღეობის ფედერალურ სამსახურში შესულია ოფიციალური განაცხადი რუსეთის ფედერაციაში "ბორჯომის" შეტანის შესახებ, რომელიც ამჟამად განიხილება", - იტყობინება "როსპოტრებნადზორი".
რამდენიმე დღის წინ რუსეთის მთავარმა სანიტარულმა ექიმმა გენადი ონიშჩენკომ განაცხადა, რომ ქართული ღვინო და მინერალური წყალი რუსულ ბაზარზე დაბრუნებას შეძლებს, თუ გაივლის ყველა აუცილებელ პროცედურას და იქნება პროდუქციის უსაფრთხოების გარანტიები.
რამდენიმე ხნის წინ ცნობილი გახდა, რომ ბელარუსიდან რუსეთში არალეგალურად შეტანილი ქართული მინერალური წყალი "ბორჯომი" აღმოაჩინეს. ამის შესახებ "როსპოტრებნადზორის" ხელმძღვანელი გენადი ონიშჩენკო აცხადებდა.
კონტრაბანდულ ბორჯომს სხვადასხვა რეგიონის სასურსათო ბაზრებზე მიაკვლიეს, მათ შორის, იგი მოსკოვშიც აღმოჩნდა. აქციზური მარკის მიხედვით, მისი იმპორტიორი "კლასიკური ღვინოები" აღმოჩნდა, რომელიც მინსკშია დარეგისტრირებული.
შემდგომ კი ბელარუსულმა კომპანია "კლასიჩესკიე ვინამ" უარყო მათი მისამართით გამოთქმული ბრალდება, რუსეთში ქართული მინერალური წყლის "ბორჯომის" უკანონო შეტანის თაობაზე.
"ბელარუსის ფარგლებს გარეთ ჩვენი კომპანიის მიერ არ ყოფილა და არც იქნება გადატანილი არც ერთი ბოთლი "ბორჯომი". ჩვენ მხოლოდ და მხოლოდ ბელარუსის შიდა ბაზარზე ვმუშაობთ", _ განაცხადა რუსულ მედიასთან საუბარში კომპანიის მმართველმა ვალერი ნავროტსკიმ.
შეგახსენებთ, რომ 2006 წელს რუსეთმა, სანიტარული ნორმების დაღვევის საბაბით, რუსულ ბაზარზე ქართული ალკოჰოლური პროდუქციისა და მინერალური წყლის შეტანა აკრძალა.
სტატისტიკის დეპარტამენტის მონაცემებით, 2006 წლამდე საქართველოდან რუსეთში ღვინის ექსპორტის მოცულობა სულ უფრო იზრდებოდა.
2005 წელს ღვინის ექსპორტის საერთო მოცულობამ 63 მილიონი აშშ დოლარი შეადგინა, რაც 27 მილიონი აშშ დოლარით მეტი იყო 2004 წლის ანალოგიურ მაჩვენებელთან და 31 მილიონით მეტი 2003 წლის მაჩვენებელთან შედარებით. 2006 წლის იანვარ-თებერვალში კი ღვინის ექსპორტმა რუსეთში 8,6 მილიონ აშშ დოლარს გადააჭარბა.
