პროექტი, რომელსაც იტალიის საგარეო საქმეთა სამინისტროს პატრონაჟით ახორციელებს მოგებაზე არაორიენტირებული იტალიური ორგანიზაცია "მაკრომიკრო", მიმართულია დედამიწის ყველაზე მნიშვნელოვან მყინვარებზე კლიმატური ცვლილელების ეფექტების შესწავლისკენ. მკვლევარებს თან ახლავს გადამღები ჯგუფი, რომელიც დოკუმენტურ ფილმს გადაიღებს.

ჯგუფის წევრებია: ფაბიანო ვენტურა, გლაციოლოგიის სპეციალისტები კენეტ ჰიუიტი და რიკარდო სკოტი, რეჟისორი მარკო პრეტი და ოპერატორი ლუკა ვენკიარუტი. მათი მუშაობის კოორდინირებას ახორციელებს სამეცნიერო კომიტეტი, რომელიც შედგება ისეთი საერთაშორისო სახელის მქონე მეცნიერებისგან, როგორებიცაა: მილანის სახელმწიფო უნივერსიტეტის მეცნიერებათა ფაკულტეტის ორდინალური პროფესორი კლაუდიო სმირალია, ვატერლოო-ონტარიოს (კანადა) უილფრიდ ლორიეს უნივერსიტეტის კვლევითი ცენტრის ""Cold Regions Research Centre" ასოცირებული მეცნიერი და გეოგრაფიისა და საბუნებისმეტყველო ფაკულტეტის დამსახურებული პროფესორი კენეტ ჰიუიტი, მიუნხენის მეცნიერებათა აკადემიის და გერმანიის გლაციოლოგიის კომისიის წევრი ქრისტოფ მეიერი, რომის გეოფიზიკისა და ვულკანოლოგიის ეროვნული ინსტიტუტის დოქტორი სტეფანო ურბინი.

"გლაციოლოგები მყინვარების გაზომვისა და ფოტოგრაფირების მეშვეობით შეაგროვებენ მონაცემებს, რომლებიც მეცხრამეტე საუკუნისა და მეოცე საუკუნის დასაწყისის მკვლევართა მიერ გადაღებულ ფოტოსურათებთან შედარების გზით, მიმდინარე კლიმატური ცვლილებების შესწავლისთვის მნიშვნელოვანი მასალა იქნება", - განაცხადა პროექტის ავტორმა და ფოტოგრაფმა ფაბიანო ვენტურამ.

ორგანიზაცია "მაკრომიკრო"-ს ექსპერტების თვალსაზრისით, საქართველოს კავკასიონზე განხორციელებული ექსპედიცია თავს მოუყრის გასული ორი საუკუნის დიდი პიონერების ექსპედიციების შედეგებს. საკმარისია გავიხსენოთ ვიტორიოს სელას (1889, 1890, 1896), მარიო პიაჩენცას (1910), ვიტორიო რონკეტის (მე-20 საუკუნის 20-30-იანი წლები) და ანდრეა პოლიცერის (1929), აგრეთვე ჰერმან ვულეის, ალბერტ ფრედერიკ მამერის, დუგლას უილიამ ფრეშფილდის, მორ დეჩის და ვილემ ჰეკელის მიერ გადაღებული ფოტოსურათები.

ექსპედიცია, რომელიც გაგრძელდება 2011 წლის 1 სექტემბრამდე, წარმოადგენს სამ კონტინენტზე ხუთი ექსპედიციის პროგრამის (ყარაყუმი (2009), კავკასიონი (დღევანდელი ექსპედიცია), რომელსაც მოჰყვება ექსპედიციები ალიასკაზე, ანდებსა და ალპებში.) მეორე ეტაპს. ექსპედიციის დასასრულს გეოფიზიკისა და ვულკანოლოგიის ეროვნული ინსტიტუტის ცენტრალურ ფილიალში გაიმართება პრესკონფერენცია, სადაც წარმოდგენილი იქნება ორგანიზაცია "მაკრომიკროს"-ს მიერ საქართველოში მიღწეული სამეცნიერო შედეგები.

ექსპედიცია "მყინვარების ნაკვალევზე - კავკასიონი 2011"-ს სამუშაოების ნახვა (ინგლისურ და იტალიურ ენებზე) რეალურ დროში შესაძლებელია ვებგვერდზე www.macromicro.it.