საპარლამენტო უმრავლესობის წარმომადგენელმა ნუგზარ წიკლაურმა პარლამენტის პლენარულ სხდომაზე დღევანდელი გამოსვლა "ვეფხისტაყაოსზე" საუბარს დაუთმო.
"დღეს, რუსთაველის დღე აღნიშნება და მოსწავლე ახალგაზრდობის სასახლეში "ვეფხისტყაოსანს" დილიდან კითხულობენ. რუსთაველის ზნეობრივი იდეალი - სიყვარული, მეგობრობა, მოყვასისთვის თავდადება არის ის იდეალები, რაც დღეს საქართველოს სახელმწიფოს ძლიერებას განაპირობებს. ამაზე არის დაფუძვნებული ქართული ზნეობრივი იდეალები და ტრადიცია, რომელიც უნდა გაგრძელდეს", - აღნიშნა წიკლაურმა.
ამასთან, საპარლამენტო უმრავლესობის წევრი ინიციატივითაც გამოდის, რომ ყოველი წლის 17 ივნისს რუსთაველის დღესთან დაკავშირებით "ვეფხისტყაოსნის" კითხვა საქართველოს ქალაქებში ერთდროულად გაიმართოს.
"მინდა, რომ ამ ტრადიციას პარლამენტიც შეუერთდეს", - აღნიშნა წიკლაურმა.
შეგახსენებთ, რომ დღეს საქართველოში რუსთაველის დღე აღინიშნება.
