"საქართველოს საგარეო საქმეთა მინისტრის გრიგოლ ვაშაძის განცხადება იმის შესახებ, რომ მისი ქვეყანა არ აპირებს ჟენევის საერთაშორისო მოლაპარაკებების ფორმატიდან გამოსვლას, საქართველოს ხელისუფლების მორიგი ტრიუკია", - აცხადებს ოს სეპარატისტთა ლიდერის ედუარდ კოკოითის ე.წ. რწმუნებული პოსტკონფლიქტური დარეგულირების საკითხებში ბორის ჩოჩიევი.
"გამოდის, რომ ვაშაძემ არ იცოდა, თუ რას ლაპარაკობდა მისი მოადგილე სერგი კაპანაძე, რომელმაც ადრე განაცხადა, რომ საქართველო ჟენევის საერთაშორისო მოლპარაკებებში მონაწილეობის აზრს ვერ ხედავს. კაპანაძე იმიზეზებდა იმას, რომ თითქოს რუსეთი რაღაც ტერორისტულ აქტებს ახორციელებდა საქართველოს წინააღმდეგ", _ აცხადებს ჩოჩიევი და აღნიშნავს, რომ ანალოგიური განცხადება საქართველოს უშიშროების საბჭოს მდივანმა გიგა ბოკერიამაც გააკეთა, თუმცა მოგვიანებით თავისი სიტყვები უარყო.
"ალბათ, მათ ეს განცხადებები ვაშინგტონში არსებულ ობკომთან კონსულტაციის გარეშე გააკეთეს, რისთვისაც მიიღეს და ეს ტიპურია საქართველოს ხელისუფლებისათვის, ვინაიდან მას არ ძალუძს საკუთარი შეცდომების აღიარება", _ აცხადებს ჩოჩიევი და დასძენს, რომ მიუხედავად ტალიავინის კომისიის მიერ გაკეთებული დასკვნისა, საქართველოს ჯერაც არ უღიარებია თავისი შეცდომა 2008 წლის აგვისტოში ომის დაწყების გამო.
"რამდენიმე დღის წინ საქართველოს ექს-პრეზიდენტმა ედუარდ შევარდნაძემ განაცხადა, რომ ფილმი "აგვისტოს 5 დღე" უკვე ვეღარ შეცვლის ტალიავინის კომისიის მიერ გაკეთებულ დასკვნას, რომელშიც ნათქვამია, რომ სამხედრო მოქმედება ცხინვალზე თავდასხმით ქართველებმა დაიწყეს და ამით ყველაფერი არიეს", _ აცხადებს ჩოჩიევი. მისი თქმით, საქართველო ყოველთვის თავის არიდებს საკითხებზე მსჯელობას და ყოველთვის უკან მიაქვს თავისი სიტყვები. ეს ქართული მენტალიტეტის დამახასიათებელია. ამისგან თავის არიდებას კი საქართველოს საგარეო საქმეთა სამინისტროს დონეზეც ვერ ახერხებენ", _ აცხადებს ჩოჩიევი.
