„ხალხის პარტიის" თავმჯდომარის, კობა დავითაშვილის თქმით, მისი პოლიტიკური მოძრაობის რიგებიდან ალექსანდრე შალამბერიძის წასვლის გადაწყვეტილება „უმძიმესი" მისაღები იყო, თუმცა აუცილებელი.
„ეს არის უმძიმესი გადაწყვეტილება, რომელიც არ იყო იოლად მისაღები. პარტიიდან შალამბერიძის წასვლა არის სერიოზული მსხვერპლი, რომელიც მან და მთლიანად „ხალხის პარტიამ" გაიღო. ეს მსხვერპლი აუცილებელი იყო, რათა ოპოზიციური „რვიანის" ერთიანობაში ბზარი არ გაჩენილიყო", - განუცხადა დავითაშვილმა „ჯი-ეიჩ-ენს".
ის შალამბერიძეს აღნიშნული გადაწყვეტილების გამო მადლობასაც უხდის და იმედს გამოთქვამს, რომ მისი „ხალხის პარტიიდან" წასვლა შალამბერიძესა და „ქრისტიან-დემოკრატებს" შორის მომხდარ აჟიოტაჟს წერტილს დაუსვამს.
შეგახსენებთ, რომ შალამბერიძემ „ხალხის პარტიიდან" წასვლის შესახებ ცოტა ხნის წინ განაცხადა. მან აღნიშნული გაზეთ „ვერსიაში" დაბეჭდილი ინტერვიუს მიზეზით ახსნა, რომელმაც „ქრისტიან-დემოკრატების" აღშფოთება გამოიწვია. შალამბერიძემ საგაზეთო ინტერვიუს გამო ბოდიში მოიხადა და იმისთვის, რომ „რვიანის" ერთიანობაში ბზარი არ გაჩენილიყო, პარტიის რიგებიდან წასვლის გადაწყვეტილება მიიღო.
