„რვიანის" გაფართოებასა და ქუჩის პოლიტიკის გაგრძელებაზე საუბარი გამორიცხულია", - ამის შესახებ დღეს, „პრაიმ ტაიმის" პრესკლუბში სტუმრობისას „ახალი მემარჯვენეების" ერთ-ერთმა ლიდერმა მამუკა კაციტაძემ განაცხადა.
მისი თქმით, თავის დროზე „რვიანი" საარჩევნო გარემოს გაუმჯობესების მიზნით შეიქმნა და მისი ამ თემიდან „გადახვევა" დაუშვებელია.
"ამოცანა და მიზანი, რისთვისაც თავის დროზე "რვიანი" შეიქმნა, არის საარჩევნო გარემოს შეცვლა, კონკრეტული შედეგის მიღება მოლაპარაკებების გზით და ამ შედეგით გარემოს გაუმჯობესება; მოლაპარაკებათა პროცესის ჩიხში შესვლამ წარმოშვა მცდარი შეხედულებები, რომ მოხდეს გააქტიურება სხვადასხვა თემატიკით; "ახალი მემარჯვენეები" ვეწინააღმდეგებით "რვიანის" სხვა თემებით დატვირთვას, "რვიანში" უნდა დარჩეს მხოლოდ ის საკითხი, რისთვისაც ის შეიქმნა. საკითხები, რომლებიც მოიცავს ადამიანის უფლებებს, პატიმართა მდგომარეობას და სხვას, რა თქმა უნდა, პრობლემას წარმოადგენს, მაგრამ ეს "რვიანის" პრობლემა არ არის", - განმარტა კაციტაძემ.
