„დემოკრატიული მოძრაობა - ერთიანი საქართველოს" ლიდერი ნინო ბურჯანაძე ეუთოს საპარლამენტო ასამბლეის პრეზიდენტ პეტროს ეფთიმიუს შეხვდა. როგორც ბურჯანაძემ შეხვედრის დასრულების შემდეგ ჟურნალისტებს განუცხადა, მან ეფთიმიუს საქართველოში არსებულ სიტუაციაზე მიაწოდა ინფორმაცია.
„მოხარული ვარ, რომ მომეცა შესაძლებლობა შევხვედროდი ეუთოს საპარლამენტო ასამბლეის პრეზიდენტს. ხელისუფლების ყველა მცდელობის მიუხედავად, რომ არ შევხვდე საქართველოში ჩამოსულ პოლიტიკოსებს, ეს შეხვედრა მაინც გაიმართა. ეფთიმიუს მივაწოდე ინფორმაცია 26 მაისის სადამსჯელო ღონისძიების შესახებ და განვუცხადე, რომ სააკაშვილის სახით ევროპამ ახალი დიქტატორი მიიღო. ასევე გავაცანი საქართველოში დღეს არსებული სიტუაცია. ვესაუბრე იმაზეც, რომ 26 მაისის მოვლენების შემდეგ არის ძალიან ბევრი უკანონო პატიმარი და უკანონოდ ნაცემი ადამიანები", - განაცხადა ბურჯანაძემ „თბილისი მარიოტში" გამართული შეხვედრის შემდეგ.
პეტროს ეფთიმიუ საქართველოში სამდღიანი ვიზიტით იმყოფება. დღეს ეფთიმიუ შეხვედრებს საპარლამენტო უმრავლესობასა და უმცირებოსთან გამართავს, ის ასევე შეხვდება პარლამენტის თავჯდომარე დავით ბაქრაძესაც. შეხვედრის დასრულების შემდეგ ბაქრაძე და ეფთიმიუ ერთობლივ ბრიფინგს გამართავენ. ეუთო-ს საპარლამენტო ასამბლეის პრეზიდენტი საქართველოს საგარეო საქმეთა მინისტრ გრიგოლ ვაშაძეს, სტრატეგიისა და საერთაშორისო ურთიერთობების კვლევის ცენტრისა და არასამთავრობო ორგანიზაციების წარმომადგენლებს შეხვდება.
16 ივნისს ეფთიმიუ ბათუმს და გორს ეწვევა, სადაც ადმინისტრაციულ სასაზღვრო ზონას და წეროვანში იძულებით გადაადგილებულ პირთა დასახლებას მოინახულებს.
მოგვიანებით კი იგი თბილისში, სასტუმრო "თბილისი-მარიოტში" არასაპარლამენტო ოპოზიციის წარმომადგენლებს შეხვდება.
ეუთო-ს საპარლამენტო ასამბლეის დელეგაცია საქართველოს 17 ივნისს გამთენიისას დატოვებს.
