"მანიფესტაციების ჩატარება შეუძლებელი გახდება", - ასე ეხმაურება „დემოკრატიული მოძრაობის" ლიდერი ნინო ბურჯანაძე "შეკრებებისა და მანიფესტაციების" შესახებ კანონში შესატან ცვლილებებს, რომელზეც პარლამენტმა მუშაობა უკვე დაიწყო.
ბურჯანაძის შეფასებითვე, აღნიშნულ საკანონმდებლო პაკეტზე მუშაობა ადასტურებს, რომ ქვეყანა არა მხოლოდ მინი ბელორუსი ხდება, არამედ მინი საბჭოთა კავშირის ჩამოყალიბებისკენ მიექანება.
„ეს ცვლილებები ნიშნავს იმას, რომ ქვეყანაში ხდება არა მინი ბელორუზაცია, არამედ ქვეყანა მიემართება მინი საბჭოთა კავშირის ჩამოყალიბებისკენ. ეს ჩვენი ხელისუფლების დიქტატორული კურსის შედეგია. ამის დასაძლევად კი ხალხის პროტესტია ხელისუფლების წინააღმდეგ", - განუცხადა ბურჯანაძემ ჟურნალისტებს.
შეგახსენებთ, რომ პარლამენტი "შეკრებებისა და მანიფესტაციის" შესახებ კანონში შესატან ახალ ცვლილებათა პაკეტზე მუშაობს, რომლის მიხედვითაც, რიგ სახელმწიფო უწყებასთან 20 მეტრი რადიუსის სიახლოვეს აქციის ჩატარება კვლავ აიკრძალება. გარდა ამისა, კანონპროექტი განსაკუთრებულ შემთხვევებში მთავრობას მანიფესტაციებში ჩართვის უფლებას ანიჭებს და აქციის ჩატარებისა და მომიტინგეთა ქცევის წესებსაც ამკაცრებს.
