საქართველოს პრეზიდენტი მიხეილ სააკაშვილი რომში ვიცე-პრეზიდენტ ჯო ბაიდენს შეხვდა. თეთრი სახლის მიერ გავრცელებულ პრესრელიზში აღნიშნულია, რომ შეხვედრისას განიხილეს საქართველოში უსაფრთხოების, დემოკრატიისა და კეთილდღეობის ის საკითხები რომლებიც საერთო ინტერესებს წარმოადგენს.
"საქართველოში უსაფრთხოების და დემოკრატიის საკითხები, ასევე რუსეთის ვაჭრობის მსოფლიო ორგანიზაციაში გაწევრიანების თაობაზე მოლაპარაკებები იყო განხილული აშშ-ის ვიცე-პრეზიდენტ ჯო ბაიდენსა და პრეზიდენტ სააკაშვილს შორის რომში 1-ელ ივნისს გამართული შეხვედრის დროს", - ნათქვამია პრესრელიზში.
აშშ-ის ვიცე-პრეიზდენტმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობისადმი შეერთებული შტატების მხარდაჭერა.
"ვიცე-პრეზიდენტმა პრეზიდენტ სააკაშვილს კიდევ ერთხელ გადაუხადა მადლობა და მადლიერება გამოთქვა, იმ ახალი წვლილისთვის რომელიც საქართველოს ავღანეთში უსაფრთხოების მხარდაჭერის ძალებში შეაქვს და რომლითაც საქართველო ნატო-ს არაწევრ სახალწიფოებს შორის ISAF-ში ყველაზე დიდ კონტრიბუტორად გახდის", - ნათქვამია პრესრელიზში და აღნიშნულია, რომ ბაიდენმა გამოხატა მხარდაჭერა შვეიცარიის შუამდგომლობით საქართველოსა და რუსეთს შორის, რუსეთის ვაჭრობის მსოფლიო ორგანიზაციაში წევრობის კანდიდატურასთან დაკავშირებით მიმდინარე მოლაპარაკებებისადმი.
ჯო ბაიდენი და მიხეილ სააკაშვილი რომში იტალიის გაერთიანების 150 წლისთავისადმი მიძღვნილ საზეიმო ღონისძიებებს ესწრებიან.
