კახეთში, კერძოდ კი საგარეჯოს რაიონში ღორის გრიპის პირველი დადასტურებული შემთხვევა გამოვლინდა. სოფელ ყანდაურის საჯარო სკოლის მე-6 კლასის მოსწავლე თბილისის იაშვილის სახელობის ბავშვთა საავადმყოფოშია გადაყვანილი.
როგორც კახეთის საინფორმაციო ცენტრისთვის გახდა ცნობილი, საგარეჯოს რაიონში მოსახლეობა პანიკაშია. პანიკის გამძაფრება, გუშინ, საგარეჯოს ერთ-ერთი სკოლის ბუღალტერის გარდაცვალებამ გამოიწვია. მიუხედავად იმისა, რომ აღნიშნულ ფაქტს საქართველოს ჯანმრთელობის დაცვის მინისტრი ალექსანდრე კვიტაშვილი გამოეხმაურა და განაცხადა, რომ ამ ფაქტს ღორის გრიპის ვირუსთან კავშირი არ აქვს, საგარეჯოს სკოლებში დღეს სასწავლო პროცესი მაინც არ შედგა. როგორც კახეთის საინფორმაციო ცენტრს საგარეჯოს საგანმანათლებლო რესურსცენტრში განუცხადეს, მოსწავლეთა სრული უმრავლესობა სკოლებში არ მივიდა.
