პარიზში, ლუვრის მუზეუმის ძარცვაში მონაწილეობის ბრალდებით გასულ კვირას დაკავებულმა ორმა კაცმა დანაშაული ნაწილობრივ აღიარა.
ამის შესახებ პარიზის პროკურორმა ლორა ბეკუამ ოთხშაბათს გამართულ პრესკონფერენციაზე განაცხადა. იუწყება Le Figaro
ბეკუას თქმით, დაკავებული ორი ეჭვმიტანილი ამჟამად მოსამართლის მიერ იკითხება, რათა მათ „ორგანიზებული ჯგუფისა და კრიმინალური დაჯგუფების მიერ ქურდობის“ ბრალდება წაუყენონ.
„მათ ნაწილობრივ აღიარეს მონაწილეობა“ ძარცვაში“, - თქვა პროკურორმა.
ასევე პროკურორმა ჟურნალისტებს მიაწოდა დეტალები დაკავებულების შესახებ. პირველი, 34 წლის, ალჟირის მოქალაქე, ადრე ქურდობაში იყო ბრალდებული.
მეორე, 39 წლის, უკანონოდ მუშაობდა კურიერად და ტაქსის მძღოლად, ნასამართლევია დამამძიმებელ გარემოებებში ქურდობისთვის.
ორივე ეჭვმიტანილის იდენტიფიცირება გამომძიებლებმა ერთ-ერთი მათგანის სკუტერზე ნაპოვნი დნმ-ისა და პოლიციის მიერ გაქცევის შემდეგ ამოღებული ნივთების შედეგად მოახდინეს.
პარიზის პროკურორმა ასევე განაცხადა, რომ ლუვრის ძარცვის დროს მოპარული ძვირფასი ნივთები ნაპოვნი არ არის.
19 ოქტომბერს ლუვრში 4 ქურდი შეიპარა. მათ იმპერიული კოლექციიდან 9 ექსპონატი მოიპარეს, მათ შორის იმპერატორ ნაპოლეონისა და მისი მეუღლის, ჟოზეფინას სამკაულები. მოპარული ნივთების ღირებულება 88 მილიონ ევროდ არის შეფასებული.
