სომხეთის პრეზიდენტი სერჟ სარგსიანი აცხადებს, რომ სომხეთსა და აზერბაიჯანს შორის საბრძოლო მოქმედებების განახლება რეალურია, თუმცა არ ესმის, რატომ აჭიანურებს აზერბაიჯანი მოლაპარაკებებს. სომხეთის პრეზიდენტი არც იმას გამორიცხავს, რომ საბრძოლო მოქმედებების განახლების შემთხვევაში აზერბაიჯანი დამარცხდეს და მას წუწუნი უკვე ახალ ტერიტორიებზე მოუხდეს. სარგსიანი ხაზგასმით აღნიშნავს, რომ რუსეთს ომის განახლების შემთხვევაში კონფლიქტში ჩარევის ვალდებულება აქვს.
სომხეთის პრეზიდენტი აცხადებს, რომ მისი ქვეყანა რა თქმა უნდა განიხილავს მთიანი ყარაბაღის დამოუკიდებლობის აღიარების საკითხს, თუმცა სარგსიანის განმარტებით, ამ ქმედების განხორციელების შესაძლებლობა რეალურად მხოლოდ საბრძოლო მოქმედებების განახლების შემთხვევაში შეიძლება დადგეს.
"რატომ არ აღიარებს სომხეთი მთიანი ყარაბაღის დამოუკიდებლობას? იმიტომ რომ ჩვენ ვაწარმოებთ მოლაპარაკებებს, ხოლო მთიანი ყარაბაღის აღიარება მოლაპარაკებათა ჩაშლის მაუწყებელი იქნება. ალბათ, მაინც უმჯობესია მოლაპარაკებები ვაწარმოოთ", _ განაცხადა სარგსიანმა.
მისი თქმით, მთიანი ყარაბაღის პრობლემა მხოლოდ კომპრომისის საფუძველზე შეიძლება გადაწყდეს.
"მაგრამ არის წითელი ხაზი: მთიანი ყარაბაღის მოსახლეობა თავად უნდა წყვეტდეს თავის ბედს და მას უნდა ჰქონდეს ყველა საშუალება, უსაფრთხოდ განვითარდეს თავის ისტორიულ სამშობლოში", _ აცხადებს სომხეთის პრეზიდენტი და დასძენს, რომ ამასთან დაკავშირებით ამ საკითხში თავისი დიდი წვლილი შეაქვს რუსეთის პრეზიდენტს დიმიტრი მედვედევს და ამისათვის სომხეთი "მისი დიდი მადლობელია".
"სწორედ მინსკის ჯგუფმა შემოგვთავაზა დოკუმენტი, რომელსაც პირობითად მადრიდის პრინციპები ეწოდება და რომელიც საკითხის გადაჭრას სამი პრინციპის გამოყენებით გულისხმობს - ძალის გამოუყენებლობა, ტერიტორიული მთლიანობის პრინციპი და ხალხთა თვითგამორკვევის უფლება", _ აცხადებს სომხეთის პრეზიდენტი და აღნიშნავს, რომ აზერბაიჯანელებს ეს პრინციპები "თავისებურად" ესმით.
"დღემდე აზერბაიჯანის ხელისუფლება ყველა დონეზე საბრძოლო მოქმედებების განახლებით იმუქრება - ეს პირველი პრინციპის დარღვევაა. ტერიტორიული მთლიანობის პრინციპი მათაც ესმით და ჩვენც, თუმცა იქმნება შთაბეჭდილება, რომ მათ ეს საკითხი აბსოლუტურად სხვა დოგმაში აქვთ აყვანილი საერთაშორისო სამართლის კონტექსტის გარეშე. ხოლო თვითგამორკვევის უფლება მათ მხოლოდ აზერბაიჯანის ტერიტორიული მთლიანობის დაცვის თვითგამორკვევა ჰგონიათ. ასეთი თვითგამორკვევა კი არ არსებობს. ამიტომაც მანამ ვიდრე აზერბაიჯანი ამ პრინციპის აზრს ვერ გაიგებს, ამ საკითხის გადაწყვეტისკენ სვლა ძალიან რთული იქნება", _ აცხადებს სომხეთის პრეზიდენტი და აღნიშნავს, რომ "ყარაბაღმა თავისი დამოუკიდებლობა სისხლისმღვრელი ომის შედეგად მოიპოვა, ურთულეს პირობებში. გულუბრყვილობა იქნებოდა გეფიქრა, რომ ყარაბაღელები უარს იტყვიან იმაზე, რასაც მიაღწიეს".
"სწორედ ამ პრინციპებმა ტერიტორიული მთლიანობისა და თვითგამორკვევის შესახებ მიიყვანეს სომხეთიც და აზერბაიჯანიც დამოუკიდებლობამდე, ხოლო ის, რომ ეს ერთ შემთხვევაში მიუღებელია, ხოლო მეორე შემთხვევაში მისაღები, არალოგიკურია", _ აცხადებს სარგსიანი და აღნიშნავს, რომ ტერიტორიული მთლიანობის პრინციპი არ ნიშნავს საზღვრების ურღვეობას. წინააღმდეგ შემთხვევაში, მსოფლიოში ახალი სახელმწიფოები არ წარმოიქნებოდნენ.
"ვფიქრობ, საბრძოლო მოქმედებების განახლების საფრთხე არსებობს და ამიტომაც არ მესმის, რატომ აჭიანურებს აზერბაიჯანი მოლაპარაკებათა პროცესს. ალბათ, არსებობს გეგმები, რომლებიც კიდევ უფრო მეტი ძალისა და საშუალების დაგროვებას ითვალისწინებს იმისთვის, რათა ხელსაყრელ მომენტში ახალი ავანტიურა ორი სცენარის მიხედვით განახორციელოს. პირველი ეს არის - ტოტალური ომი და მთიანი ყარაბაღის ოკუპაცია, რომელიც შესაძლებელია მხოლოდ მთიანი ყარაბაღის მოსახლეობის სრული განადგურებით და მეორე სცენარი - აზერბაიჯანის დამარცხება და მის მიერ ახალი ტერიტორიების დაკარგვა. და ამის შემდეგ აზერბაიჯანი უკვე დაიწყებს წუწუნს დაკარგულ ხუთ, ექვს ან მეტ რაიონზე და რა იქნება შემდეგ? კვლავ მოლაპარაკებები და ახალი ომი - ყოველი ეს უპერსპექტივოა", _ აცხადებს სომხეთის პრეზიდენტი და დასძენს, რომ რაც შეეხება რუსეთს ამ შემთხვევაში, მასზე "ძალიან ბერვია დამოკიდებული".
"არასოდეს გვეგონა, რომ რუსეთი მკაცრ პროსომხურ პოზიციას დაიკავებდა. ის დიდი სახელმწიფოა და აზერბაიჯანიც ხომ მისი მეზობელია და ამიტომაც რუსეთი, თურქეთისგან განსხვავებით, შეუძლებელია მხოლოდ ერთი მხარის პოზიციას უჭერდეს მხარს, მაგრამ მეორე მხრიდან რუსეთი ჩვენი პარტნიორია კოლექტიური უსაფრთხოების შესახებ შეთანხმების მიხედვით და ჩვენი უსაფრთხოებისთვის საფრთხის შექმნის შემთხვევაში მას რეაგირების ვალდებულება აქვს. დღეს კი ჩვენი ურთიერთობები რუსეთთან ძალიან კარგია. არც კი ვიცი, როდის იყო ჩვენი ურთიერთობები უფრო კარგი - საბჭოთა კავშირის დროს თუ ახლა", _ აცხადებს სომხეთის პრეზიდენტი.
