ტერიტორიული მთლიანობის აღდგენის საკითხთა დროებითი კომისიის სხდომაზე პროექტ "ოკუპაციის" ფარგლებში ჩეხოსლოვაკიის შესახებ გადაღებული დოკუმენტური ფილმების ფრაგმენტების ჩვენება მოეწყო.
ფილმები ჩეხოსლოვაკიაში გასული საუკუნის განმავლობაში ორჯერ განხორციელებულ ოკუპაციას ეძღვნება. "განწირული ჩეხოსლოვაკია" 1938-39 წლებში ფაშისტური გერმანიის მიერ ჩეხოსლოვაკიის რეგიონების ანექსიას, "პრაღის გაზაფხული" კი 1968 წელს კომუნისტური საბჭოეთის მიერ ქვეყნის ოკუპაციის ფაქტებს ასახავს.
საქართველოში ჩეხეთის საგანგებო და სრულუფლებიანი ელჩის მოადგილის, მიროსლავ კოსების განცხადებით, გასული საუკუნის განმავლობაში ჩეხოსლოვაკიამ ორი ოკუპაცია გადაიტანა, რამაც მძიმე კვალი დატოვა ჩეხეთის ისტორიაზე და მენტალიტეტზე, მაგრამ ქვეყანამ მისი დაძლევა მოახერხა.
"მინდა იცოდეთ, რომ ჩვენი სახით გყავთ მეგობარი და პარტნიორი, რომელიც თავისუფლებისათვის ბრძოლაში თქვენ გვერდითაა", - განაცხადა ელჩმა.