საქართველოს მთავრობასა და საერთაშორისო სავალუტო ფონდს (სსფ) შორის ახალი პროგრამის დაწყების შესახებ ინტენსიური მოლაპარაკებების მიმდინარეობს. ამის შესახებ სსფ-ის მუდმივმა წარმომადგენელმა საქართველოში ედუარდ გარდნერმა განუცხადა.
გარდნერის განმარტებით, ამ ეტაპზე მხარეებს შორის მიმდინარეობს ტექნიკური საკითხების დაზუსტება და დისკუსია. „ეს არის იმის წინაპირობა, რომ ახალი პროგრამის დაწყებასთან დაკავშირებით საქართველოს მთავრობამ ფონდში ოფიციალური განცხადება გააკეთოს," - განმარტავს გარდნერი.
მისი განმარტებით, ახალი პროგრამა კონცენტრირებული იქნება მთავრობისა და ქვეყნის დახმარებაზე, რაც ხელს შეუწყობს ეკონომიკურ სტაბილურობას და ფისკალური დეფიციტის შემცირებას.
პროგრამა სავარაუდოდ 2 წლის ვადით დამტკიცდება და 2013 წლისთვის დასრულდება.
საქართველოს სსფ-ის მორიგი მისია 2011 წლის 13-28 აპრილს სტუმრობდა. როგორც გარდნერი ამბობს, ივნისის დასაწყისში მისიის შეფასებებზეა დამოკიდებული სსფ-ის მიერ საქართველოსთვის მორიგი, დაახლოებით 110 მლნ აშშ დოლარის მოცულობის ტრანშის გამოყოფის საკითხი.
მისია საქართველოს ბოლო, IX მიმოხილვის ფარგლებში სტუმრობდა. გარდნერის თქმით, ივნისის დასაწყისში ფონდის აღმასრულებელ დირექტორთა საბჭოს სხდომაზე მიღებული გადაწყვეტილებით, საქართველოში 2008 წელს დაწყებული სსფ-ის Stand-By პროგრამა დასრულდება. "საქართველოს ფონდი დადებითი შეფასების მიღების შემთხვევაში დაახლოებით 110 მლნ აშშ დოლარს გამოუყოფს და საქართველოს მთავრობა ამ თანხის ათვისებას დაუყონებლივ შეძლებს, თუკი მას ამის სურვილი ექნება," - განმარტავს გარდნერი.
ფონდის აღმასრულებელმა საბჭომ საქართველოსთვის 2008 წლის სექტემბერში დამტკიცებული Stand-By Arrangement-ის (SBA) ფარგლებში გამოყოფილი ფინანსური დახმარების, 477,1 მლნ SDR-ის, 747,1 მლნ SDR-მდე გაზრდის შესახებ გადაწყვეტილება 2009 წლის 6 აგვისტოს მიიღო. შესაბამისად, Stand-By Arrangement-ის ხანგრძლივობის ვადა 18-დან 33 თვემდე (2011 წლის 14 ივნისამდე) გაიზარდა.
