საერთაშორისო სავალუტო ფონდი (სსფ) კავკასიისა და ცენტრალური აზიის რეგიონის ეკონომიკებისთვის რამდენიმე ძირითად გამოწვევას ასახელებს.
როგორც სასტუმროში "რადისონ ბლუ ივერია" სსფ-ის შუა აღმოსავლეთისა და ცენტრალური აზიის განყოფილების დირექტორის მოადგილემ დევიდ ოუენმა 2011 წლის აპრილის რეგიონალურ ანგარიშის პრეზენტაციაზე განაცხადა, საქართველოს ისევე როგორც მთელ რეგიონს მოუწევს ინფლაციის, სოციალური დაძაბულობისა და ბანკების საკრედიტო პორტფელის უხარისხობის გამოწვევაზე პასუხის გაცემა.
"საქართველოში გლობალური კრიზისის პირობებში 9%-იანი ფისკალური დეფიციტი იყო, რაც ბუნებრივად განაპირობებდა ხარჯების ზრდას. ამჟამად, ფისკალური დეფიციტი უკვე კორექტირებულია და ეს სახარბიელოა. სურსათსა და ნავთობის მაღალი ფასები შესაძლოა სხვა ნებისმიერ სამომხმარებლო პროდუქტზე აისახოს", - განმარტავს ოუენი.
მისივე განმარტებით, ინფლაციის საკითხი განსაკუთრებით საყურადღებოა.
"საქართველოს ეროვნული ბანკი ამაზე აქცენტს ყოველთვის აკეთებდა, თუმცა ამჯერად იგი ამ რისკზე განსაკუთრებით ყურადღებით უნდა იყოს, რომ არ მოხდეს ინფლაციისა და ფასების უმართავ პოზიციამდე გაზრდა. საქართველოსთვის, ისევე როგორც ბევრი სხვა განვითარებადი და რეგიონის ქვეყნისთვის სურსათზე ფასების შენარჩუნებას განსაკუთრებული მნიშვნელობა აქვს, რადგან სურსათის წილი კალათაში მაღალია. ფასები მნიშვნელოვან გავლენას მოახდენს მოსახლეობაზე, რადგან ქვეყანაში არ არსებობს ეფექტიანი სოციალური დაცვისა და საპენსიო სისტემები, მით უმეტეს, რომ ინფლაციის მაჩვენებელი უკვე 14%-ს აღწევს", - განმარტავს ოუენი.
მისივე განმარტებით, რეგიონის ყველა ქვეყნისთვის უმეტესად მაინც ორი ძირითადი გამოწვევა-სურსათსა და საწვავზე მაღალი ფასები და ფისკალური დეფიციტის შემცირებაა. "ფისკალური დეფიციტის შემცირება აუცილებელია, რათა არ გაიზარდოს ვალის მოცულობა და მის მომსახურებას პრობლემები არ შეექმნას. საქართველოში აუცილებელია ეკონომიკის მდგრადი ზრდა, უმუშევრობისა და თანაბარუფლებიანობის მაჩვენებლის გაუმჯობესება, რათა მიღწეული ეკონომიკური წისვლით იხეიროს დაბალი სოციალური ფენის წარმომადგენლებმაც," - განმარტავს დევიდ ოუენი.
