როგორც სახალხო დამცველმა გიორგი ტუღუშმა დღეს, პარლამენტში "ქრისტიან-დემოკრატებთან" შეხვედრის დროს განაცხადა, გლდანის #8 დაწესებულებიდან არაერთი საჩივარი შემოსულა და მონიტორინგის დროსაც აღმოჩნდა პატიმრების მიმართ არასათანადო მოპყრობა, ცემის ფაქტი.
"იყო შემთხვევა, როდესაც ჩვენ ადგილზე ვნახეთ თვალ-ბუდის ჩალურჯებით პატიმრები, რომლებიც ამბობდნენ, რომ დილით საწოლიდან ჩამოვარდნენ და ამის გამო აქვთ დაზიანება. ასევე სხვა დაწესებულებში ამ კუთხით აქტუალური იყო ფეხბურთის თამაშის თემა, როდესაც ნაცემი პატიმრები გვეუბნებოდნენ, რომ ფეხბურთის თამაშის დროს დაზიანდნენ", - აღნიშნა ტუღუშმა.
მისივე თქმით, ამ დრომდე ერთ-ერთ მთავარ პრობლემად რჩება აღნიშნული ფაქტების გამოძიება, რაც სისტემური ხასიათის პრობლემაა.
"ჩვენ არ გვაქვს მონაცემები რამდენი პირი მიეცა პასუხისგებაში კანონის დარღვევის გამო და არასათანადოდ მოეპყრნენ პატიმრებს. მონაცემები არ გვაქვს იმიტომ, რომ ასეთი პირები ფაქტიურად არ არსებობენ. მართალია იწყება გამოძიება, მაგრამ არ არის ეფექტური და სამედიცინო ექსპერტიზაც კი 1-2 თვის დაგვიანებით ინიშნება, როდესაც პატიმარს დაზიანებებიც აღარ აღენიშნება და შესაბამისად ხდება გამოძიების შეწყვეტა", - აღნიშნა მან.