საპარლამენტო უმრავლესობა საკონსტიტუციო სასამართლოს მიერ "მანიფესტაციების და შეკრებების შესახებ" კანონში გაუქმებული ნორმების ინიცირებას თავიდან მოახდენს.
როგორც ჟურნალისტებს საპარლამენტო უმრავლესობის წევრმა, იურიდიულ საკითხთა კომიტეტის თავმჯდომარემ პავლე კუბლაშვილმა განუმარტა, საკონსტიტუციო სასამართლოს მიერ გაუქმებული ნორმების ახლებურად რეგულაციის შესახებ პარლამენტი მსჯელობას გააგრძელებს.
"პარლამენტმა უნდა იმსჯელოს, როგორ რეგულაცია იქნება ამ საკითხებთან მიმართებაში, ამიტომ ცვლილებები "მანიფესტაციების და შეკრებების შესახებ" კანონში აუცილებლად შევა. შეიძლება ეს საკითხი ახლებურად დარეგულირდეს. ისე, როგორც ამაზე სასამართლო გადაწყვეტილებაში იქნება მითითებული", - დასძინა კუბლაშვილმა.
უმრავლესობის წევრი ოპოზიციას გამოეხმაურა და აღნიშნა, რომ მათთვის მიუღებელია ის პოზიცია, რომელიც მათ ოპონენტებს აქვთ.
"ჩვენი ოპონენტები ამბობდნენ, რომ თურმე კანონიერი და კონსტიტუციურია, გზებზე ბარიკადები მოაწყო, გზის ბლოკირება მოახდინო. კანონში ამ ნაწილს, რა თქმა უნდა, აღარ შევეხებით ის ნორმები დარჩება, რაც აქამდე იყო", - აღნიშნა კუბლაშვილმა.
შეგახსენებთ, რომ საკონსტიტუციო სასამართლომ ოპოზიციის წარმომადგენელთა სარჩელი ნაწილობრივ დააკმაყოფილა და არაკონსტიტუციურად ცნო ის ნორმები, რომლებიც ზოგიერთი დაწესებულებისა და ადმინისტრაციული ორგანოს, მათ შორის სასამართლოს შესასვლელიდან 20 მეტრის რადიუსში შეკრებებისა და მანიფესტაციის ჩატარებას კრძალავდა.
სასამართლომ ასევე არაკონსტიტუციურად მიიჩნია ის ნორმა, რომლის მიხედვითაც ქვეყნის მოქალაქეს არ ეძლეოდა უფლება, შეკრებისა და მანიფესტაციის ინიციატორი ყოფილიყო, ხოლო მოქალაქეობის არმქონე პირს - აქციისთვის ორგანიზება გაეწია და პასუხისმგებელი პირი ყოფილიყო.
