SACE საქართველოში იტალიური კომპანიების შემოყვანითა და ქვეყანაში იტალური ინვესტიციების განხორციელებით დაინტერესდა. იტალიაში ოფიციალური ვიზიტისას, საქართველოს პრემიერ-მინისტრი SACE-ს (Italian export credit insurance and financial services Group) პრეზიდენტს ჯოვანი კასტელანეტას უკვე შეხვდა.
"მნიშვნელოვანია ეკონომიკურ ურთიერთობებზე საუბარი. გვქონდა შეხვედრა "საჩეს" პრეზიდენტთან. "საჩე" არის საინვესტიციო ინსტიტუტი, რომელსაც ძალიან დიდი ინტერესი აქვს განახორციელებინოს ინვესტიციები იტალიურ კომპანიებს", - განაცხადა ნიკოლოზ გილაურმა ჯოვანი კასტელანეტასთან შეხვედრის შემდეგ.
იტალიში ვიზიტისას, გილაური იტალიის პარლამენტის თავმჯდომარეს ჯანფრანკო ფინის და იტალიელ ბიზნესმენებს შეხვდა და მათ საქართველოში არსებულ ბიზნესგარემოზე ესაუბრა.
"იტალიური ბიზნესის წინაშე საქართველოს ეკონომიკის პრეზენტაცია გაკეთდა და ძალიან დიდი ინტერესი გამოიწვია, იტალიელ ბიზნესმენებს საქართველოში ჩამოსვლის სურვილი გაუჩნდათ, უნდათ გამოცადონ, სხვადასხვა დარგში გააკეთონ ინვესტიციები. აღმოჩნდა, რომ რამდენიმე კომპანია უკვე ჩამოდის და უკვე აწერენ კონტრაქტებს ხელს საქართველოში ინვესტიციების განხორციელებაზე, მათ შორის ენერგეტიკაში, ინფრასტრუქტურულ პროექტებზე, სოფლის მეურნეობის პროექტებზეც. ვნახოთ, რა შედეგი იქნება. იმედი მაქვს, რომ საკმაოდ დიდი ინტერესი იქნება მომავალში იტალიური ბიზნესისგან და იტალიური კერძო სექტორისგან საქართველოში საინვესტიციო გარემოს გამოსაკვლევად", - განაცხადა პრემიერ-მინისტრმა ბიზნესწრეების წარმომადგენლებთან შეხვედრის შემდეგ.
აღსანიშნავია, რომ იტალიაში ვიზიტისას გილაური ვიცე პრემიერ-მინისტრს ჯანი ლეტას, იტალიის ეკონომიკის განვითარების მინისტრს პაოლო რომანისაც შეხვდება.
