შიდა ბაზარზე გასატან ღვინოებზე ადგილწარმოშობის დასახელების დეგუსტაციის ვალდებულება გაუქმდა. აღნიშნულთან დაკავშირებით "ვაზისა და ღვინის შესახებ" კანონში ცვლილებები პარლამენტმა დღეს მესამე მოსმენით დაამტკიცა.
კანონში შეტანილი ცვლილებების თანახმად, დეგუსტაციის სავალდებულობა მხოლოდ ექსპორტზე გასატანი ადგილწარმოშობის დასახელების ღვინოებზე შესაბამისობის სერტიფიკატის გასაცემად რჩება.
დანარჩენ შემთხვევაში კი კანონით დეგუსტაცია ნებაყოფლობითი იქნება და მას დაკვეთის საფუძველზე, "სამტრესტთან" შექმნილი მუდმივმოქმედი სადეგუსტაციო კომისია განახორციელებს.
ასევე, კანონში შესული ცვლილებების თანახმად, "სამტრესტთან" შექმნილი მუდმივმოქმედი სადეგუსტაციო კომისიის მიერ ადგილწარმოშობის დასახელების ღვინოების დადებითად შეფასებისას, პროდუქციის ეტიკეტზე "სამტრესტის" მიერ სპეციალური ჰოლოგრამა "მოწონებულია" აღარ დაიტანება.
