კოპიტნარის აეროპორტით რამდენიმე კომპანიაა დაინტერესებული, ამის შესახებ საგენტო "ჯი-ეიჩ-ენს" ეკონომიკისა და მდგრადი განვითარების სამინისტროში განუცხადეს. სამინისტროს ინფორმაციით, ამ დროისათვის სამინისტროში რამდენიმე კომპანიის განაცხადია შესული, თუმცა, საქმის ვითარებიდან გამომდინარე, სამინისტროში კომპანიების წარმომავლობასა და რაოდენობაზე კომენტარს არ აკეტებენ.
როგორც ცნობილია, ეკონომიკისა და მდგრადი განვითარების სამინისტრომ ქუთაისის აეროპორტის მართვისა და განვითარებისთვის ინტერესის გამოსახატად, წინასწარი კვალიფიკაციის გასავლელად, განაცხადების მიღება უკვე დაიწყო.
სამინისტროში განმარტავენ, რომ მთავრობა განიხილავს: შპს „ქუთაისის აეროპორტის" აქტივების სიმბოლურ ფასად - 1 ლარად გასხვისებას ქუთაისის აეროპორტის საერთაშორისო სტანდარტებთან შესაბამისობაში მოსაყვანად და ქუთაისის აეროპორტის ნებისმიერი ევროპული დაბალბიუჯეტიანი კომპანიის მომსახურებისთვის, რომლის წლიური გადაზიდვების რაოდენობა 20 მლნ. მგზავრს არ ჩამოუვარდება. ინტერესის გამოხატვა არ ატარებს ტენდერის ან აუქციონის სახეს, შესაბამისად, მთავრობას აქვს უფლება, არ მიიღოს არც ერთი განაცხადი. მთავრობა ინარჩუნებს უფლებას გააგრძელოს მოლაპარაკებები შერჩეულ კომპანიებთან პირობებთან დაკავშირებით. საქართველო მთავრობაა თანახმაა იყოს პროექტის თანადამფინანსებელიც.
ეკონომიკისა და მდგრადი განვითარების სამინისტროს ინფორმაციით, „ქუთაისის აეროპორტი" სახელმწიფო საკუთრებაში არსებული საწარმოა, რომელიც ქუთაისიდან 20 კილომეტრის დაშორებით მდებარეობს. იგი მოიცავს 35,5 ჰექტარ მიწის ნაკვეთს და 2 300 კვ.მ. შენობის ფართს. აეროპორტის ამჟამინდელი გადაზიდვის ტევადობა საათში 200 მგზავრს შეადგენს. აეროპორტი, ყოველგვარი სეზონური შეფერხების გარეშე, 24 საათის განმავლობაში ფუნქციონირებს.
