მედიამაუწყებლები ვალდებულები ხედებიან კომუნიკაციების მარეგულირებელ კომისიას შემოსავლებზე დივერსიფიცირებული ინფორმაცია წარუდგინონ. ამის შესახებ დღეს, პარლამენტის პლენარულ სხდომაზე "მაუწყებლობის შესახებ" კანონში ცვლილებების პროექტის განხილვისას პროექტის ერთ-ერთმა ავტორმა დეპუტატმა ჩიორა თაქთაქიშვილმა განაცხადა.
მისი თქმით, მაუწყებელს დაევალება ყოველწლიურად წარადგინოს ინფორმაცია დაფინანსების წყაროების შესახებ, კერძოდ, თუ რა თანხა მიიღო რეკლამიდან, სპონსორობიდან და შემოწირულობიდან.
ამასთან, ოპოზიცია ითხოვდა კანონში ჩაიწეროს, რომ მაუწყებლები ვალდებულები იყვნენ საერთაშორისო სტანდარტების ფინანსური აუდიტის განხორციელებაზე, თუმცა უმრავლესობას მიაჩნია, რომ აუდიტის და ბუღალტრული წარმოების სტანდარტი კანონმდებლობით განსაზღვრულია და დამატებითი რეგულაციების შემოღება მიზანშეწონილი არ იქნება.
როგორც ოპოზიციის აღნიშნულ მოთხოვნაზე თაქთაქიშვილმა განმარტა, საერთაშორისო სტანდარტების მქონე აუდიტორული კომპანიის ანაზღაურება უფრო მაღალია და შესაბამისად სახელმწიფოს ჩარევით, მომსახურების ფასი კიდევ უფრო გაიზრდება, რითაც განსაკუთრებით რეგიონალური კომპანიები დაზარალდებიან.
"ჩვენ ვერ ჩავაყენებთ პრივილეგირებულ მდგომარეობაში ცალკეულ აუდიტორებს, ხელს ვერ შევუწყობთ ფასების ხელოვნურ ზრდას. არ არის აუცილებელი დამატებითY ჩარევა სახელმწიფოს მხრიდან", - დასძინა თაქთაქიშვილმა.
