ოპოზიციური "რვიანი" საქართველოში ევროკავშირის ელჩს ფილიპ დიმიტროვს შეხვდა. როგროც შეხვედრის დასრულების შემდეგ ჟურნალისტებს "რვიანის" წარმომადგენელმა, "რესპუბლიკური პარტიის" ლიდერმა დავით უსუფაშვილმა განუცხადა, საუბარი საარჩევნო საკითხებზე ოპოზიციასა და ხელისუფლებას შორის მიმდინარე მოლაპარაკებებს შეეხო.
"ჩვენ რეგულარულად ვაყენებთ საქმის კურსში დიპლომატებს იმის თაობაზე, თუ რა ხდება ამ მიმართულებით. დღეს ევროკავშირის ელჩს გავაცანით "რვიანის" ის წინადადებები, რომლებზეც ხელისუფლება დუმილით პასუხობს, რადგან საპასუხო ჯერჯერობით არაფერი აქვს", - განმარტა უსუფაშვილმა.
მისივე თქმით, "რვიანი" საარჩევნო გარემოს გაუმჯობესებისთვის დაწყებულ პროცესს გააგრძელებს და მას შედეგამდე მიიყვანს.
"ხელისუფლება მძიმე დღეშია, მაგრამ მას აქვს გამოსავალი და ეს გამოსავალი იმაში მდგომარეობს, რომ შემოვიდეს ჩვენთან სერიოზულ განხილვაში და მოლაპარაკებების მაგიდას დაუბრუნდეს", - აღნიშნა უსუფაშვილმა.
