სოფლის მეურნეობის სფეროში მექანიზაციის პროგრამა საპარტნიორო ფონდის ფარგლებში განხორცილდება. ამის შესახებ დღეს, საპარლამენტო უმრავლესობის წევრმა, საფინანსო-საბიუჯეტო კომიტეტის თავმჯდომარემ ზურაბ მელიქიშვილმა აღნიშნა.
მელიქიშვილი თავის გამოსვლაში საპარლამენტო უმცირესობის მიერ სოფლის მეურნეობის სექტორის დაფინანსების შესახებ კრიტიკას გამოეხმაურა, აღნიშნა, რომ ვერ დაეთანხმება ოპოზიციას, რომელიც ანაკლიაში წყალსადენების და კანალიზაციის მიწყობას ზეიმების დაფინანსებას უწოდებს.
"მიჭირს პოლემიკაში შევიდე ოპოზიციასთან, რომელიც ანაკლიაში წყალსადენების და კანალიზაციის დაფინანსებაზე იძახის, რომ ჩვენ იქ ზეიმების მოწყობას ვაფინანსებთ", - აღნიშნა მელიქიშვილმა.
რაც შეეხება 150 მილიონს, რომელსაც სოფლის მეურნეობაში უნდა ჩაიდოს, დეპუტატის მტკიცებით მექნიზაციისთვის განკუთვნილი 29.5 მილიონი ლარი უკვე დევს საპარტნიორო ფონდში.
ამასთან, მელიქიშვილმა დღეს კიდევ ერთხელ ჩამოთვალა ის პროექტები, რომელზეც სახელმწიფო კერძო სექტორთან და საერთაშორისო საფინანსო ინსტიტუტებთან ერთად აპირებს განახორციელოს.
კერძოდ კი ეს ეხება 9 პროექტს, კერძოდ კი სოფლის მეურნეობის პროდუქციის ლოჯისტიკური ცენტრი - 40.5 მლნ. ლარი (გარდაბანი); სიმინდის საშრობი და შესანახები - 22 მლნ. ლარი (ლაგოდეხი); მექანიზაცია (ტრაქტორები, კომბაინები და აგრეგატები) - 29.5 მლნ. ლარი; სარგავი მასალის სათბურები (ბოსტნეულის ჩითილის წარმოაბა (ზუგდიდი) - 15 მლნ. ლარი; საცდელი მეურნეობა წვეთოვანი მორწყვით (სოფელი ნიქოზი) - 5 მლნ. ლარი; დაწვიმებით მორწყვითი სისტემების დანერგვა (გარდაბანი; დედოფლისწყარო) - 5 მლნ. ლარი; სადრენაჟო კოლექტორების აღდგენა დასავლეთ საქართველოში - 5 მლნ.ლარი; მოცვის სადემონსტრაციო ფართობის მოწყობა (აჭარა, გურია, იმერეთი) - 3 მლნ. ლარი და სხვა ინფრასტრუქტურული პროექტები 25 მლნ. ლარი.