აჭარაში ინვესტიციების მოცულობა უმნიშვნელოდ, 0,5 %-ით გაიზარდა. სტატისტიკური მონაცემების თანახმად, 2011 წლის იანვარ-მარტში აჭარაში 37 მლნ. დოლარის ინვესტიცია განხორციელდა, მაშინ როდესაც 2010 წლის პირველ კვარტალში, რეგიონში 36,8 მლნ. დოლარის ინვესტიციაა განხორციელებული.
როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროდან აცნობეს, 2011 წლის პირველ კვარტალში განხორციელებული ინვესტიციიდან, 41 % (15 მლნ. დოლარი) ადგილობრივი, ხოლო 59 % (22 მლნ. დოლარი) უცხოური კაპიტალია. წელს აჭარაში განხორციელებული ინვესტიციიდან, 17,5 მლნ. დოლარი ტურიზმში, 11,5 მლნ. დოლარი მშენებლობაში, 7 მლნ. დოლარი მრეწველობაში, 0,5 მლნ. დოლარი ტრანსპორტსა და კავშირგაბმულობაში, ხოლო დარჩენილი 0,5 მლნ. დოლარი კი ეკონომიკის სხვადასხვა დარგებში გადანაწილდა.
