დანიის სამეფოს მიერ გამოყოფილი 9 მილიონი ევრო სამცხე-ჯავახეთსა და ქვემო ქართლში კერძო სასოფლო-სამეურნეო სექტორის განვითარების ხელშეწყობას მოხმარდება. ამის შესახებ დღეს საგარეო საქმეთა მინისტრის მოადგილის, დავით ჯალაღანიასა და დანიის საგარეო საქმეთა სამინისტროს დელეგაციის შეხვედრისას გახდა ცნობილი.
შეხვედრაზე აღინიშნა, რომ რეგიონალურ-ეკონომიკური განვითარების პროგრამის დაფინანსება (დაახლოებით 9 მლნ. ევრო) მოხდება ერთობლივად დანიის სამეზობლო პროგრამისა (დაახლ. 6.5 მლნ ევრო) და SDC-ის (დაახლ 2.5 მლნ ევრო) მიერ.
დელეგაციას დანიის საგარეო საქმეთა სამინისტროს ტექნიკურ-საკონსულტაციო მომსახურების დეპარტამენტის უფროსი ტექნიკური მრჩეველი ჰანს ჰენრიკ მადსენი ხელმძღვანელობდა.
დანიის მიერ ფინანსური დახმარება 2008 წლის დონორთა კონფერენციაზე საქართველოს დასახმარებლად აღებული ვალდებულების ფარგლებში ხორციელდება.
ჯალაღანიამ და დანიის საგარეო საქმეთა სამინისტროს წარმომადგენელმა შეხვედრაზე დანიური მხარის დაფინანსებით კონკრეტული პროგრამის განხორციელების საკითხები განიხილეს.
