ქუთაისის ინდუსტრიული ზონის მმართველი, ეგვიპტური კომპანია "ფრეში", ზონის განვითარებით მთავრობის მიერ უკმაყოფილების შესახებ ინფორმაციას არ ფლობს.
როგორც "ჯი-ეიჩ-ენთან" საუბრისას, "ფრეშის" წარმომადგენელმა მიხეილ თიგიშვილმა განაცხადა, მას პარლამენტში პრემიერ-მინისტრის გამოსვლისთვის არ უსმენია და შესაბამისად კომენტარსაც ვერ გააკეთებს.
როგორც დღეს, პარლამენტის სესიაზე გახდა ცნობილი, უახლოეს პერიოდში მთავრობა ქუთაისის ინდუსტრიული ზონის განვითარებასთან დაკავშირებით კონკრეტულ გადაწყვეტილებას მიიღებს,
როგორც სამთავრობო დებატებისას, საქართველოს პრემიერ-მინისტრმა ნიკა გილაურმა განაცხადა, მთავრობა ქუთაისის ინდუსტრიული ზონის განვითარებით უკმაყოფილოა. გილაურს არ დაუკონკრეტებია თუ რა ღონისძიებები და ქმედებები გატარდება ქუთაისის ინდუსტრიული ზონის მიმართ.
ქუთაისისგან განსხვავებით ნიკა გილაური ფოთის ინდუსტრიული ზონის განვითარებით კმაყოფილია.
მისი თქმით ფოთის ინდუსტრიული ზონა ვითარდება და ის უკვე 30 კომპანიაა შესული.
შეგახსენებთ, რომ ქუთაისის ინდუსტრიული ზონის განვითარებით უკმაყოფილება პარლამენტის წინაშე, რამოდენიმე დღის უკან ეკონომიკისა და მდგრადი განვითარების მინისტრმა ვერა ქობალიამაც დააფიქსირა.
2009 წლის 6 აპრილს ეგვიპტურ კომპანია "ფრეშს" (კომპანიის პრეზიდენტი იბრაჰიმ ხალილი) და მის ქართულ პარტნიორ კომპანია "ჯორჯიან ინტერნეიშენალის ჰოლდინგის" -ს (კომპანიის პრეზიდენტი მიხეილ თიგიშვილი) შორის გაფორმდა ურთიერთთანამშრომლობის მემორანდუმი, რომლის მიხედვით ქუთაისის ავტოქარხნის მიმდებარე ტერიტორიაზე შეიქმნა თავისუფალი ინდუსტრიული ზონა და ამ ეტაპზე უკვე აშენდა თანამედროვე მსოფლიო სტანდარტის ქარხანა (კომპლექსი), რომელიც საოჯახო ტექნიკას აწარმოებს. მთლიანობაში, ქუთაისის თავისუფალ ინდუსტრიულ ზონაში 12 საინვესტიციო პროექტი უნდა განხორციელებულიყო და 12 ქარხანა აშენებულიყო, რაშიც საინვესტიციო გეგმის თანახმად, 1 მილიარდ 280 მილიონ დოლარზე მეტი ინვესტიცია ჩაიდება.
საკუთრივ, ეგვიპტური კომპანია ფრეშ-ის ინვესტიცია ქუთაისში 455 მილიონი დოლარია.
ეკონომიკისა და მდგრადი განვითარების სამინისტროს ვებ-გვერდზე გათავსებული ინფორმაციით თანახმად, ფრეშ-ის გარდა, ქუთაისის თავისუფალ ინდუსტრიულ ზონაში 11 სხვადასხვა კომპანია განახორციელებს ინვესტიციებს, მათ შორის მსოფლიოს ისეთი გიგანტი კომპანიები, როგორიცაა "კასტური", რომელიც არის გერმანული კომპანია "მანის" ლიცენზიის მფლობელი. "კასტური" ქუთაისში ავტობუსებსა და მაღალი დონის ტრაილერებს ააწყობს. ასევე, ქითაისში მსოფლიო დონის მწარმოებლები გამოუშვებენ სანტექნიკას, ტექსტილს, ავეჯს, კაფელს, კერამიკას და ა. შ.
