"ბათუმი მალე საკრუიზო გემების მიმღები ქალაქი გახდება"- ამის შესახებ აჭარის მთავრობის სხდომაზე, მთავრობის თავმჯდომარემ ლევან ვარშალომიძემ განაცხადა.
ვარშალომიძის განმარტებით, ორწლიანი პროექტის დეტალები მაიამიში მისი ვიზიტისას შეთანხმდა. აპრილში აჭარაში უცხოელი სპეციალისტები ჩამოვლენ და ბათუმის პორტის ტურისტული ინფრასტრუქტურის შესაბამის დიზაინზე იმუშავებენ.
ლევან ვარშალომიძის განმარტებით, საკრუიზო გემების შემოსვლა რეგიონში ტურისტების რიცხვს მნიშვნელოვნად გაზრდის და ამ მხრივ 2012 წელი გარდატეხის წელი იქნება.
მთავრობის თავმჯდომარემ, სხდომაზე პირველი კვარტლის შედეგები შეაჯამა და განაცხადა, რომ წინა წელთან შედარებით აჭარაში ვიზიტორთა რიცხვი 77 პროცენტითაა გაზრდილი. საშუალოდ წლის განმავლობაში ტურისტების რიცხვის მატებას 30-50 პროცენტით ელიან.
