აშშ-ის პრეზიდენტის, დონალდ ტრამპის მტკიცებით, 2022 წლის 24 თებერვალს, რუსეთის სრულმასშტაბიანი შეჭრის დაწყებისას, რუსულ არმიას კიევის აღება რამდენიმე საათში შეეძლო, თუმცა ერთ-ერთი რუსი გენერლის შეცდომამ და ძლიერმა წვიმამ ეს გეგმა ჩაშალა.
ტრამპმა ამის შესახებ 20 ოქტომბერს, თეთრ სახლში გამართულ პრესკონფერენციაზე ისაუბრა.
ტრამპის მტკიცებით, წინა ღამით ბოლო ათი წლის განმავლობაში ყველაზე ძლიერი წვიმა მოვიდა, რის შედეგადაც მიწა წყლით გაჟღენთილი და ტალახიანი გახდა, რუსული ტანკები კი გადაადგილებას ვეღარ ახერხებდნენ.
„რუსებს ათასი ტანკი ჰყავდათ, რომლებიც ბეტონის გზატკეცილით გადაადგილდებოდნენ. ოთხ საათში ისინი უკრაინაში იქნებოდნენ. მათ ვერაფერი შეაჩერებდა. ომი ერთ დღეში დასრულდებოდა. მაგრამ ამ ძალიან სულელმა გენერალმა გადაწყვიტა, გზატკეცილიდან გადაეხვია და სასოფლო-სამეურნეო სავარგულების გავლით, შემდეგ კი მარცხნივ, კიევისკენ წასულიყო, ნაცვლად იმისა, რომ გზატკეცილს გაჰყოლოდა. საბოლოოდ, ის ტალახში ჩაეფლო. ეს ჭაობის ქვიშას ჰგავდა. ტანკები წინ ვეღარ მიდიოდნენ და უკანაც ვეღარ ბრუნდებოდნენ“, - განაცხადა ტრამპმა.
მისი შეფასებით, რუს გენერალს საბედისწერო შეცდომა რომ არ დაეშვა, რუსული ძალები კიევამდე სამ-ოთხ საათში მიაღწევდნენ, ომი კი, შესაძლოა, ერთ დღეში დასრულებულიყო. ტრამპმა ასევე აღნიშნა, რომ უკრაინას მანამდე აშშ-ის მიერ მიწოდებული Javelin-ის ტიპის ტანკსაწინააღმდეგო სისტემები დაეხმარა რუსული ჯავშანტექნიკის განადგურებაში.
