2011 წელს "საქართველოს რკინიგზასთან" გაფორმებული შეთანხმების თანახმად, "ვაგონმშენებელმა კომპანიამ" 2000 ცალი წყვილთვალი უნდა შეაკეთოს. გარდა ამისა, 2011 წელსვე იგეგმება 41 ვაგონ-ცისტერნისა და 120 ხორბალმზიდი ვაგონის მომსახურების ვადის გაგრძელებით კაპიტალური შეკეთება და 185 ახალი ვაგონ-ცისტერნის დამზადება. სულ "საქართველოს რკინიგზასთან" გაფორმებული კონტრაქტის თანახმად, კომპანია შეასრულებს დაახლოებით 40 მილიონი ლარის ღირებულების სამუშაოს.
"ვაგონმშენებელი კომპანიის" მუშაობას დღეს, ეკონომიკისა და მდგრადი განვითარების მინისტრი გაეცნო. საწარმოში მიმდინარე სამუშაო ვერა ქობალიამ "საქართველოს რკინიგზის" გენერალურ დირექტორ ირაკლი ეზუგბაიასთან ერთად დაათვალიერა.
"ვაგონმშენებელი კომპანია" ძირითადად შპს "საქართველოს რკინიგზის" დაკვეთებს ასრულებს. მათ შორის გაფორმებული ხელშეკრულებების თანახმად, 2005-2010 წლებში გარემონტდა დახურული ვაგონები, ნახევარვაგონები, ვაგონ-ცისტერნები და ცემენტმზიდი ვაგონები.
"ვაგონმშენებელი კომპანიის" მიერ გამოშვებულ ვაგონებსა და ცისტერნებს გაუკეთდება წარწერა "დამზადებულია საქართველოში".
როგორც ეკონომიკისა და მდგრადი განვითარების მინისტრმა ქარხანაში მიმდინარე სამუშაოს დათვალიერების შემდეგ აღნიშნა, "ვაგონმშენებელი კომპანია" ერთ-ერთი წარმატებული საწარმოა, რომელიც წლების განმავლობაში სტაბილურად მუშაობს და მეტიც, ყოველწლიურად ზრდის წარმოების მოცულობას და შემოსავლებს. შესაბამისად, იზრდება სამუშაო ადგილებიც. ვერა ქობალია განცხადებით, ეს საწარმოს ხელმძღვანელობის მიერ განხორციელებულ სწორ მენეჯმენტზე მეტყველებს.
როგორც მინისტრმა აღნიშნა, მნიშვნელოვანია, რომ "საქართველოს რკინიგზა" სწორედ ქართულ საწარმოებთან თანამშრომლობს, რაც დამატებითი სტიმულია მათთვის და დადებითი ფაქტორი ზოგადად ქართული ეკონომიკისთვის.
საწარმოში ამჟამად დასაქმებულია 800 ადამიანი. თუმცა "საქართველოს რკინიგზასთან" გაფორმებული კონტრაქტის შესასრულებლად, შეიქმნება დამატებით 600 ახალი სამუშაო ადგილი. საწარმოში დასაქმებულთა საშუალო ხელფასი 500 ლარია.
შპს "ვაგონმშენებელი კომპანია" ქალაქ რუსთავში მდებარეობს, ის 2005 წელს შეიქმნა. საწარმო ასრულებს სატვირთო ვაგონების მიმდინარე, სადეპოო, კაპიტალურ და მომსახურების ვადის გაგრძელებით შეკეთებებს. საწარმოს მინიჭებული აქვს წყვილთვლების სრული დამოწმების და ახალი ელემენტებით ფორმირების უფლება.
