ევრობონდების მეორე ემისიის შედეგად მიღებული თანხით მთავრობა იმ 500 მილიონი დოლარის გასტუმრებას გეგმავს, რა ვალიც საქართველოს ევრობონდების პირველი ემისიის შემდგომ დაუგროვდა.
საფინანსო-საბიუჯეტო კომიტეტის თავმჯდომარე ზურაბ მელიქიშვილი აცხადებს, რომ აღნიშნული თანხა, შესაძლოა, პირველად ემისირებული ევრობონდების გამოსასყიდად იქნეს გამოყენებული. 2011 წლის განმავლობაში, ევრობონდების გამოშვებაზე და მის ცალკეულ დეტალებზე საფინანსო საბიუჯეტო კომიტეტში 1-ელ აპრილს, საფინანსო-საბიუჯეტო კომიტეტის მორიგ სხდომაზე იმსჯელებენ.
როგორც დღეს საფინანსო-საბიუჯეტო კომიტეტის სხდომაზე, ფინანსთა მინისტრის პირველმა მოადგილემ პაპუნა პეტრიაშვილმა განაცხადა, საქართველოს 2008 წელს გამოშვებული ევრობონდების დაფარვა 2013 წელს უწევს და შესაბამისად, 2011 წელს ემისირებული ფასიანი ქაღალდებიდან მიღებული თანხები სწორედ ამ ვალის დასაფარად იქნება მიმართული. იმავდროულად იზრდება ევრობონდის ვადიანობაც და ის ნაცვლად 5 წლისა, 7-iდან 10 წლამდე იქნება.
საფინანსო საბიუჯეტო კომიტეტის თავმჯდომარე, 2011 წლის ბიუჯეტში შესატანი ცვლილებების პაკეტს მნიშვნელოვან ეკონომიკურ მოვლენას უწოდებს, რადგანაც ზურაბ მელიქიშვილის განმარტებით, მშპ-iს ზრდა და საბიუჯეტო დეფიციტის შემცირება, ქვეყნის მაკროეკონომკური სტაბილურობის მაჩვენებელია.
"2011 წლის ბიუჯეტში შესატანი ცვლილებები მთავრობამ უკვე წარმოადგინა, რომლის მიხედვითაც საგადასახადო შემოსავლები 360 მილიონი ლარით იზრდება და 2011 წელს საგადასახადო შემოსავლები 5 მილიარდ 660 მილიონი ლარით იქნება განსაზღვრული. იზრდება ასევე მშპ-ც და ნაცვლად 4,5 პროცენტისა, ის 5,5 პროცენტი იქნება. და რაც ასე მნიშვნელოვანია საქართველოს მაკრო-ეკონომიკური მაჩვენებლებისთვის ეს არის ის, რომ საბიუჯეტო დეფიციტი 4,3 %-iდან 3,7%-მდე მცირდება", - აცხადებს მელიქიშვილი.