პარლამენტი "საქართველოსა და აზიის განვითარების ბანკს შორის დაფინანსების ჩარჩო ხელშეკრულების" რატიფიცირებას უახლოეს პერიოდში მოახდენს. როგორც საფინანსო-საბიუჯეტო კომიტეტის სხდომაზე ფინანსთა მინისტრის მოადგილემ, რუსუდან კემულარიამ განაცხადა, აზიის განვითარების ბანკის მიერ 500 მილიონი დოლარი გამოიყოფა, რომელიც საქართველოს რეგიონებში წყალმომარაგების სისტემის რეაბილიტაცია-მშენებლობას მოხმარდება.

კემულარიას განცხადებით, აღნიშნული თანხიდან დაფინანსდება წაყალმომარაგების სისტემის აღდგენა ქალაქებში: ქუთაისი, მარნეული, ფოთი, ზუგდიდი, ანაკლია და მესტია.

ფინანსთა სამინისტროს ინფორმაციით საქართველოსა და აზიის განვითარების ბანკს შორის 23-24 თებერვალს, "ურბანული მომსახურების გაუმჯობესების საინვესტიციო პროგრამის"დოკუმენტის საბოლოო ტექსტზე აზიის განვითარების ბანკთან მოლაპარაკებები გაიმართა. აღნიშნული მოლაპარაკებების დროს შეთანხმდა დაფინანსების ჩარჩო ხელშეკრულების და სასესხო ხელშეკრულების ტექსტები და გაფორმდა მოლაპარაკების ოქმი. აზიის განვითარების ბანკიდან მიღებული შემოთავაზების შესაბამისად, საქართველოს შესაძლებლობა აქვს, ბანკთან გააფორმოს ჩარჩო ხელშეკრულება 500 მლნ. დოლარის ფინანსურ პაკეტზე, რომელიც გამოყენებულ იქნება 2011-2019 წლებში ურბანული მომსახურების გაუმჯობესების პროექტების დასაფინანსებლად.