ფინანსთა სამინისტროს ინფორმაციით, გაუმჯობესებული ეკონომიკური გარემოს ასახვის, სოციალური და რეგიონალური დაფინანსების ზრდის უზრუნველსაყოფად და სახელმწიფო ვალის მართვის საჭიროებიდან გამომდინარე, მთავრობამ პარლამენტს 2011 წლის სახელმწიფო ბიუჯეტში ცვლილებები წარუდგინა.
ფინანსთა სამინისტოში განმარტავენ, რომ მთლიანი შიდა პროდუქტის ზრდა იცვლება 4.5 პროცენტიდან 5.5 პროცენტზე, რაც მიუთითებს, რომ ეკონომიკური ზრდის დაბალი სცენარიდან - 4,5 პროცენტი, ქვეყანა გადადის საბაზისო სცენარზე - 5.5 პროცენტი და შესაძლებელია 2011 წლის მეორე ნახევარში რეალიზებული იყოს ეკონომიკური ზრდის მაღალი სცენარი - 6,5 პროცენტი, თუმცა მსოფლიო ეკონომიკაში არსებული რისკებიდან გამომდინარე, ამ ეტაპზე უმჯობესია ქვეყნის ფისკალური გათვლები კვლავ, ამჯერად უკვე კონსერვატიულ - 5,5 პროცენტიან სცენარს დაემყაროს.
სამინისტროში აცხადებენ, რომ სახელმწიფო ბიუჯეტის შემოსავლები იზრდება 348 843.0 ათასი ლარით, მათ შორის: საგადასახადო შემოსავლები 5 300 000,0 ლარიდან იზრდება 350 000,0ათასი ლარით და მისი საპროგნოზო მოცულობა განისაზღვრა 5 650 000,0 ათასი ლარით. (საგადასახადო შემოსავლების სახით მისაღები შემოსავლების გადაანგარიშება მოხდა განახლებული მაკროეკონომიკური პროგნოზების გათვალისწინებით, რომლის მიხედვითაც, 2011 წელს ეკონომიკის ზრდის საპროგნოზო მაჩვენებელი 5,5%-ია)
ასევე, სახელმწიფო ბიუჯეტის გადასახდელები იზრდება 230 185,4 ათასი ლარით.
აღსანიშნავია, რომ დანარჩენი თანხები მოხმარდება ფისკალურ კონსოლიდაციას ანუ დეფიციტის გეგმაზე და საერთაშორისო სავალუტო ფონდთან შეთანხმებულ პარამეტრზე უფრო სწრაფად შემცირებას 4,3 პროცენტიდან 3,7 პროცენტამდე (1986 კლასიფიკაციით) რამაც ხელი უნდა შეუწყოს ქვეყნის ფისკალურ სტაბილურობას, საფინანსო ბაზრებზე გასვლას და საგარეო დაფინანსებაზე დამოკიდებულების უფრო მეტად შემცირებას.
სამინისტროში აცხადებენ, რომ ხარჯები მიიმართება შემდეგი პრიორიტეტული ღონისძიებების დასაფინანსებლად, მათ შორისაა: შრომის, ჯანმრთელობისა და სოციალური დაცვის სამინისტროს ასიგნებები იზრდება 86 096,8 ათასი ლარით: 2011 წლის 1 სექტემბრიდან ასაკით პენსიონერებისა და პირველი ჯგუფის ინვალიდი პენსიონერებისთვის მინიმალური პენსიის 100 ლარამდე გაზრდისთვის - 55 200,0 ათასი ლარი; სოციალურ და ჯანდაცვის პროგრამებში დეფიციტის თავიდან ასაცილებლად - 30 000,0 ათასი ლარი - ტუბერკულოზის რეგიონული პროგრამებისთვის - 896,8 ათასი ლარი. ხოლო რეგიონული განვითარებისა და ინფრასტრუქტურის სამინისტროს ასიგნება იზრდება 15 000,0 ათასი ლარით;
ფინანსთა სამინისტროს ინფორმაციით, ეკონომიკისა და მდგრადი განვითარების სამინისტროს ასიგნებები იზრდება -10 996,5 ათასი ლარით; - (ტურიზმის განვითარებისა და ამ სფეროში ინვესტიციების მოზიდვის ღონისძიებების დასაფინანსებლად) რეგიონებში სოფლის მეურნეობის განვითარების პროგრამებისთვის დამატებით 9 000 ათასი ლარი გამოიყოფა.
რეგიონებში განსახორციელებელი პროექტების ფონდი იზრდება - 48 000,0 ათასი ლარით, ქვეყნის სხვადასხვა რეგიონებში ინფრასტრუქტურული პროექტების დაფინანსებისთვის.
კანონპროექტი ითვალისწინებს საგარეო ფასიანი ქაღალდების ემისიის შედეგად დამატებით მისაღებ 900.0 მლნ ლარს. 900 მლნ ლარის ოდენობით საგარეო ფასიანი ქაღალდების (ევრობონდების) გამოშვებიდან მიღებული სახსრების ნაწილი 2011 წელსვე მიმართული იქნება 2008 წელს გამოშვებული ევრობონდების რეფინანსირებაზე, ხოლო ნაწილი შემდგომ წლებში სახელმწიფო ვალდებულებების შემცირებაზე. ბიუჯეტის კანონის პროექტით განისაზღვრება, რომ საგარეო ფასიანი ქაღალდების ემისიით მიღებული დამატებითი შემოსულობები არ იქნება გამოყენებული ბიუჯეტში გაწერილი ხარჯებისა და არაფინანსური აქტივების ზრდის დასაფინანსებლად.
ასევე, იგეგმება დამატებით 100,0 მლნ ლარის მოცულობის სახაზინო ვალდებულებების გამოშვება, რაც დაეხმარება საქართველოს ეროვნულ ბანკს ინფლაციის წინააღმდეგ მონეტარული პოლიტიკის ეფექტურ წარმართვაში.
შეგახსენებთ, რომ 2011 წლის სახელმწიფო ბიუჯეტში ცვლილებების შეტანის შესახებ განცხადება ფინანსთა მინისტრმა 22 მარტს პარლამენტში გამოსვლისას გააკეთა